Almaty oblysynda qylmystyq top qolǵa tústi
TALDYQORǴAN. QazAqparat - Almaty oblysynda qarýlar men oq-dárilerdi jáne iri kólemde aqsha urlaǵan qylmystyq top ustaldy, dep habarlaıdy QazAqparat tilshisi.
«Oqıǵa 29 qazan kúni Talǵar aýdanynda boldy. Úı ıeleriniń joqtyǵyn paıdalanǵan qylmyskerler plastıkalyq terezeni kerip ashyp, arnaıy seıfte saqtaýly qarý-jaraqtar men oq-dárilerin, iri kólemdegi qarjyny jymqyrǵan», - dedi Almaty oblysy Polıtsııa departamentiniń baspasóz qyzmeti.
Oqıǵa ornyna kelgen tártip saqshylary jedel-izdestirý sharalaryn uıymdastyryp, qylmysqa qatysy bar tulǵalardy anyqtady. Talǵar aýdany polıtsııasynyń jeke quramyn jumyldyryp, qylmys jasaǵan top músheleri ustaldy. Qolǵa túsken 28-35 jastaǵy Almaty qalasynyń 3 turǵyny da buǵan deıin qylmystyq áreketi úshin jaýapkershilikke tartylǵan bolyp shyqty.
«Polıtsııaǵa der kezinde habar berilgeniniń nátıjesinde qylmyskerler iz sýytpaı qolǵa tústi. Bul fakti boıynsha QR Qylmystyq kodeksi 188-babynyń 3-tarmaqshasyna sáıkes sotqa deıingi tergeý amaldary júrgizilýde.
Qazirgi ýaqytta qylmyskerlerden jaýap alyndy. Sondaı-aq, olardyń basqa da qylmystarǵa qatysy anyqtalý ústinde. Kúdiktiler Talǵar aýdany polıtsııasynyń ýaqytsha ustaý ızolıatoryna qamaqqa alyndy», - dep atap ótti oblystyq polıtsııa ókilderi.
Aıta keteıik, oblystyq polıtsııanyń aqparatyna sáıkes, qazirgi tańda óńirdegi qarý-jaraq ıelerine qoıylatyn talaptardy tártip saqshylary qatań baqylaýǵa alǵan. Jyl basynan beri polıtseıler zańsyz aınalymnan 90-ǵa jýyq qarý tárkilegen. Olardyq ishinde ańshy myltyqtary, sholaq myltyqtar, gaz jáne travmatıkalyq qarýlar bar. Osyndaı jaǵdaılar oryn almaýy úshin qarý ıelerin elimizdiń zańnamasyn qatań saqtaý qajet ekenin eskertedi.
