Almaty oblysynda qutqarýshylar júkti áıeldi trassa boıynda bosandyryp aldy
TALDYQORǴAN. QazAqparat – Almaty oblysynda trassa boıyndaǵy medıtsınalyq pýnktiń qutqarýshylary júkti áıeldi bosandyryp aldy, dep habarlaıdy QazAqparat.
QR Tótenshe jaǵdaılar mınıstrligi Apattar medıtsınasy ortalyǵynan málim etkendeı, keshe Almaty oblysynyń «Kúrti» trassalyq medıtsınalyq-qutqarý pýnktine saǵat 14.40-ta 20 jastaǵy júkti áıel kómek surap barǵan.
«Trassalyq pýnkt feldsheri júkti áıeldi qaraı bastaǵan sátte onyń tolǵaǵy bastalyp ketken. «Kúrti» TMQP dárigerleri áıeldi sol jerde aman-esen bosandyryp aldy. Qutqarýshy-medıkterdiń sózinshe, qyz bala dúnıege kelgen. Sábıdiń sol sáttegi jaǵdaıy qanaǵattanarlyq dep baǵalandy. Qazirgi ýaqytta bosanǵan áıel men náreste Almaty oblysy Іle aýdanynyń ortalyq aýrýhanasyna jetkizildi. Der kezinde kórsetilgen medıtsınalyq kómektiń arqasynda bala men ananyń ómirine qaýip tóngen joq», - delingen baspasóz habarlamasynda.
Eske salaıyq, avtojoldar boıyndaǵy medıtsınalyq-qutqarý pýnktteri jol-kólik oqıǵalary kezinde shuǵyl kómek kórsetýmen qatar, óz betimen járdem surap kelgen jolaýshylarǵa da medıtsınalyq kómek beredi.
«Trassalyq medıtsınalyq qutqarý pýnkteri ashylǵan sátten bastap ótinish bildirgen 17 myń azamatqa kómek kórsetildi. Olardyń 900-den astamy emdeý mekemelerine jetkizildi», - dedi Apattar medıtsınasy ortalyǵynan.
