Almaty oblysynda qus ósirýshiler sýbsıdııa ala almaı, Antıkorǵa shaǵymdandy

QONAEV.QazAqparat - Almaty oblysynyń kásipkeri 2022 jyldan bastap qus etin óndirgeni úshin berilýge mindetti 180 mln teńge kóleminde sýbsıdııa ala almady, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi Almaty oblysy boıynsha departamentiniń málimetinshe, kásipkerdiń ótinimderin jergilikti atqarýshy organdar qabyldamaı, ótinim berý merziminiń aıaqtalýyna deıin sozǵan.

«Birneshe ret bas tartqannan keıin kásipker ákimshilik talap-aryzben sotqa júginip, Almaty oblysynyń mamandandyrylǵan aýdanaralyq ákimshilik sotymen qanaǵattandyrylǵan.

Alaıda, osyǵan qaramastan, ýaqytyly tólem jasalmady. Bul ónimniń jańa kólemin óndirýde qıyndyqtarǵa ákep soqty.

Bul fakt «Atameken» óńirlik kásipkerler palatasyna jáne Sybaılas jemqorlyqqa qarsy qyzmet departamentine júginýge negiz boldy», - delingen vedomstvonyń habarlamasynda.

Nátıjesinde másele Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste qaralyp, ýákiletti organǵa sýbsıdııany tóleý jóninde sharalar qabyldady.