Almaty oblysynda kúdik týǵyzǵan sheteldikterdiń ne maqsatta júrgeni anyqtaldy
TALDYQORǴAN.QazAqparat – Almaty oblysynda turǵyndarǵa kúdik týǵyzǵan sheteldikterdiń ne maqsatta júrgeni anyqtaldy. Polıtsııanyń málimetinshe, sheteldikter - Ońtústik Koreıa eliniń azamattary jáne olar dinı baǵytta úgit-nasıhat júrgizbegen, dep habarlaıdy QazAqparat tilshisi.
2020 jylǵy 14 qańtarda aýdandyq polıtsııa basqarmasyna Shamalǵan aýyly Úshqońyr orta mektebiniń ustazdarynan mektep mańynda belgisiz shetel azamattarynyń bastaýysh synyp oqýshylaryn jınap, olarǵa belgisiz baǵytta úgit-nasıhat júrgizgeni týraly habar tústi. Aqparat polıtsııada resmı tirkeldi.
«Jergilikti polıtsııa basqarmasynyń jedel tergeý toby oqıǵa oryna shuǵyl jetip, Ońtústik Koreıa memleketiniń 38-41 jastaǵy 3 azamatynyń kámelet jasyna tolmaǵan balalarmen júrgenin jáne olardyń elimizge qańtar aıynyń basynda týrıstik maqsatta kelgenin anyqtady. Tekserý barysynda sheteldik qonaqtardyń dinı baǵytta úgit-nasıhat jasaǵany nemese qandaı da bir zattardy satqany ne syılaǵany dálelin tappady. Polıtseıler týrısterdi polıtsııa basqarmasyna ákelip, túsindirý jumysyn júrgizgen soń bosatty» delingen Almaty oblystyq polıtsııa departamentiniń baspasóz qyzmeti taratqan málimdemede.
Vedomstvonyń aqparatyna sáıkes, atalǵan derekke qatysty tártip saqshylarynyń áreketi jergilikti prokýratýra organdarymen kelisilgen.
Aıta keteıik, buǵan deıin áleýmettik jelide kishkentaı balalarmen júrgen sheteldikterdiń kúdik týǵyzǵan vıdeojazbasy jarııalanǵan bolatyn.
