Almaty oblysynda Kóten táýip kesenesi janynan qonaq úı ashyldy
TALDYQORǴAN.QazAqparat - Almaty oblysynda «Rýhanı jańǵyrý» baǵdarlamasy aıasynda Kóten táýip Qońyrbaıulynyń mavzoleıine zııarat etýshilerge arnalǵan qonaq úı turǵyzyldy. Sharanyń saltanatty ashylýyna Sarqan aýdanyna jumys saparymen barǵan Almaty oblysy ákiminiń orynbasary Jaqsylyq Omar qatysty, dep habarlaıdy QazAqparat óńir basshysynyń baspasóz qyzmetine silteme jasap.
Halyq arasynda Kóten táýip atalyp ketken Qoılybaı Qońyrbaıuly, óz zamanynda Abylaı han men Bógenbaı batyrdyń jeke keńesshisi bolǵan jáne jaraqat alǵan adamdardy emdeýmen aınalysqan. Onyń atyn ereksheleıtin tusy eshkimniń eshqashan betin qaıtarmaı, kez-kelgen jaǵdaıda qolynan kelgenshe kómek ushyn bergen myqty emshiligi ári kóripkeldi bolǵan desedi. Sondyqtan onyń Lepsi stansasynan 25 mınýt qashyqtyqta ornalasqan mavzoleıi ejelden sakraldy oryn sanalyp keledi. Emshiniń rýhyna qulshylyq jasap, dertine shıpa suraýshylar elimizdiń túkpir-túpkirinen jınalady. Endi mine, jergilikti bılik pen metsenattardyń múmkinshilikterin bir arnaǵa toǵystyrýynyń arqasynda kelýshilerge jaıly jaǵdaı jasaý maqsatynda 50 oryndyq qonaq úı turǵyzyldy.
«Óskeleń urpaq úshin mundaı ıgi ister úlgi-ónege bolmaq. Memleket basshysy jahandaný zamanynda qoǵamdyq sananyń rýhanı jańǵyrýy týraly tekten-tek aıtyp qana qoımaı, ózimizdiń is-áreketimizben, oı-sanamyzben ózimizdiń mádenıetimiz ben tarıhı qundylyqtarymyzdy saqtaýǵa erekshe kózqaraspen qaraýymyz tıis. Bul baǵytta biz úshin el Prezıdentiniń baǵdarlamalyq maqalasy men «Rýhanı jańǵyrý» baǵdarlamasynda kórsetilgen baǵyttarǵa júgine otyryp, aýqymdy jumystar atqarýymyz qajet», - dedi Jaqsylyq Omar.
Mavzoleı shyraqshysy Talǵatbek Káripjanovtyń aıtýynsha, murajaı men mavzoleıden quralǵan keshenge jylyna 1500 adam keletin kórinedi
