Almaty oblysynda kóshi-qon zańyn buzǵandarǵa 45 mln teńgeden astam aıyppul salyndy
TALDYQORǴAN. QazAqparat- Koronavırýs indetiniń jappaı taralýyna oraı memlekettik shekaralar uzaq ýaqyt karantınge jabylǵanymen, jyl basynan beri 23 881 sheteldik azamat Almaty oblysy Polıtsııa departamenti Kóshi-qon qyzmetine júgingen, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, tártip saqshylarynyń qyzmetin paıdalanǵan sheteldikterdiń basym bóligi - TMD elderiniń al, 186 adam alys shet el azamattary.
«Elimizdiń kóshi-qon zańnamasyn buzǵan 4 954 tulǵa ákimshilik jaýapkershilikke tartylǵan. Onyń 2 943 dereginde Qazaqstan azamattarynyń zań talaptaryn saqtamaǵany anyqtaldy. Elimizdiń zańnamasyn óreskel buzǵan 139 sheteldik azamat el aýmaǵynan shyǵarylǵan. Al, eki tulǵaǵa qatysty kóshi-qon zańynyń talaptaryn buzý deregi boıynsha qylmystyq is qozǵalǵan. Kóshi-qon zańnamasynyń talaptaryn buzǵan azamattarǵa 45 mıllıon teńgeden astam aıyppul salynyp, memleket paıdasyna óndirildi. Jyl basynan beri 26 773 tulǵa elimizde jumys jasaýyna qajetti ruqsat rásimdedi», - dedi Almaty oblysy PD Kóshi-qon qyzmeti basqarmasy bastyǵynyń orynbasary Elmurat Nurseıitov.
