Almaty oblysynda kóshede kókpar uıymdastyrǵandar ustaldy

QONAEV. QazAqparat - 24 shilde kúni Almaty oblysynyń Talǵar qalasynda kóshede kókpar tartqandar ustaldy, dep habarlaıdy QazAqparat tilshisi.

«50 jastaǵy Keńdala aýylynyń turǵyny óziniń týǵan kúnine oraı kókpar uıymdastyrǵan. Biraq shara ákimdikpen kelisilmegen. Kókpar oıyny qystaqtan bastalyp, qalanyń kóshesinde jalǵasyp ketken. Kólikterdiń qozǵalysyna kedergi keltirip, qoǵamdyq tártipti buzǵandardyń barlyǵy anyqtaldy. 10 adam ustalyp, QR Ákimshilik kodekstiń 434, 593 jáne 614-baptary boıynsha jaýapkershilikke tartyldy», - delingen Almaty oblystyq Polıtsııa departamenti baspasóz qyzmetiniń habarlamasynda.

Keıin kókparǵa qatysqandar halyqtan keshirim surady.

«24 shilde kúni kókpar bolýyna baılanysty sonda bardym. Kókpar barysynda Talǵardyń kóshesine shyǵyp ketip, avtokólikterdiń qozǵalysyna kedergi keltirgenimiz úshin Talǵar turǵyndarynan keshirim suraımyn», - dedi kókparǵa qatysqan Turar Rysqulov aýylynyń turǵyny, 24 jastaǵy Dáýren Janmyrzaev.

Ulttyq oıynnyń ózge de qatysýshylary turǵyndardan keshirim surap, endi ondaı áreketke barmaıtyndaryn aıtty.

Eske salaıyq, kósheniń qaq ortasynda kókpar tartqandardyń vıdeosy jelige taraǵan bolatyn.