Almaty oblysynda «Kóshbasshy» jastar syılyǵyna qujat qabyldaý bastaldy
Jyl saıyn túrli salada jetistikkke jetip, kósh bastap júrgen belsendi jastarǵa Almaty oblysy ákiminiń «Kóshbasshy» jastar syılyǵy tabystalyp keledi. Aıtýly shara bıyl da óz jalǵasyn taýyp, ár salanyń úzdik jastary «2021 jyldyń Kóshbasshysy» atanbaq.
«Syılyqqa úmitker retinde Almaty oblysynyń 14 jastan 29 jasqa deıingi belsendi jastary qatysa alady. Nomınatsııa jeńimpazy ataný úshin úmitkerler belgili bir salada jetistikterge jetýi qajet. Sonymen qatar, oblystyq, respýblıkalyq, halyqaralyq baıqaýlar jeńimpazdary, qoǵamdyq ómirge belsendi qatysyp, eldiń alǵysyn alǵan jastar ótinimderin ótkizýlerine bolady. Syılyqqa usynylý úshin úmitker belsendi, bilimdi, kreatıvti oılaıtyn, Qazaqstannyń jarqyn bolashaǵy jolynda aıanyp qalmaıtyn naǵyz kóshbasshy jas bolýy kerek»,-dedi Almaty oblysy jastar saıasaty máseleleri basqarmasynyń basshysy Eldar Saparov.
Bıyl atalmysh baıqaý oblysymyzda 19-ret ótkizilgeli tur.
Jyl sanap, jastardyń baıqaýǵa degen qyzyǵýshylyǵy men jeńiske degen umtylystary artyp keledi. Oǵan ár jyl saıyn kelip túsetin ótinimder sany mysal bola alady.
2019 jyly 200-den astam qatysýshy óz baqtaryn synasa, byltyrǵy jyly úmitkerler sany 350-ge jýyqtaǵan.
Bıyl óńir jastary tómendegi 20 nomınatsııa boıynsha baq synaıdy:
«Úzdik jas memlekettik qyzmetshi»
«Úzdik jas áskerı qyzmetker»
«Úzdik jas dáriger»
«Úzdik jas ustaz»
«Úzdik jas ǵalym»
«Úzdik jas sportshy»
«Úzdik jas jýrnalıst»
«Úzdik jas kásipker»
«Úzdik jas batyr»
«Aýyl sharýashylyǵynyń úzdik jas mamany»
«Úzdik jas otbasy»
«Úzdik jas ónerpaz»
«Jasyl el» jasaǵynyń úzdik sarbazy»
«Úzdik stýdent»
«Úzdik erikti»
«Jas ulan» biryńǵaı balalar men jasóspirimder uıymynyń úzdik kóshbasshysy»
«Úzdik jastar isi jónindegi ádisker-nusqaýshy»
«Úzdik jas saıasatker»
«Jastar úkimettik emes uıymynyń úzdik kóshbasshysy»
«Úzdik jas ádebıetshi»
Ár jeńimpazǵa 250 myń teńge kólemindegi aqshalaı sertıfıkat tabystalady.
