Almaty oblysynda qos basylym bir ǵasyrlyq mereıtoıyn toılaıdy
TALDYQORǴAN. QazAqparat - Almaty oblysynyń bas basylymdary - «Alataý ottary» jáne «Jetisý» gazetteri 100 jyldyq mereıtoıyn toılaıdy. Aýqymdy sharanyń qurmetine Ortalyq kommýnıkatsııalar qyzmetiniń óńirlik fılıalynda ótken brıfıngte mereıli merekege daıyndyq jumystary talqylandy, dep habarlaıdy «QazAqparat» HAA.
«Taǵdyr bizge osynaý bir abyroıly kezeńde eńbek etý baqytyn jazdy, qazir tek Jetisý ólkesiniń ǵana emes, búkil respýblıkamyzdyń tarıhı basylymdary 100 jyldyǵyn atap ótýde. Biz eki gazettiń bes júz mıllıonynshy danasy jaryq kórgen tusta jıyn ótkizip, keler jyly ǵasyrlyq mereıtoıymyzdy toılaý josparymyzdy halyqpen bóliseıik dep sheshtik», - deıdi «Ólke tynysy» JShS dırektory Meıram Janádilov.
Gazet redaktorlary Ámire Arın men Atsalym Idigov gazettiń tarıhy jaıly qysqasha áńgimelep, jýrnalıstik eńbek qashanda halyqtyń múddesi jolynda qyzmet etip kelgenin aıtty.
Mereıtoı sharalaryn uıymdastyrýǵa oblys ákimi Amandyq Batalov qoldaý kórsetip otyr. Sonyń arqasynda mereıtoı aıasynda gazettiń tarıhyna arnalǵan kitaptardy baspadan shyǵarý, jýrnalıster alleıasynyń ashylýy, aıtys uıymdastyrý, shyǵarmashylyq keshter men baıqaýlar, oqyrmandarmen kezdesý ótkizý sııaqty kóptegen sharalar josparlanyp otyr.
Brıfıng sońynda jýrnalıster gazetterdiń mereıtoılyq danasyna qoltańba jazyp, oqyrmandarǵa tabys etti, sondaı-aq halyq múddesi jolynda talmaı eńbek etetindikterin aıtty.
