Almaty oblysynda kórshisiniń sıyryn urlaǵandar mal soıyp jatqanda ustaldy
TALDYQORǴAN. QazAqparat - Almaty oblysynyń Panfılov aýdanynda sıyr urlaǵan azamat mal soıyp jatqanda ustaldy. Naǵarashy eldi mekeniniń turǵyny aýyldasynyń malyn qorasynan aıdap áketip, óz úıinde soıǵan, dep habarlaıdy QazAqparat tilshisi.
3 sáýir kúni aýyl turǵyny Panfılov aýdandyq polıtsııa bólimine shaǵym túsirgen. Oqıǵa ornyna barǵan tártip saqshylary jábirlenýshimen birge aýyldyń ishin sholyp, jedel izdestirý jumysyna kirisedi. Mańaıdaǵy úılerdiń birinde sıyrdy baýyzdap, jiliktep jatqan azamattyń ústinen túsedi. Alǵashqyda qasapshy óz malyn soıyp jatqanyn aıtyp aqtalǵan. Biraq maldyń qulaǵyndaǵy belgi arqyly sıyrdyń zańdy ıesi anyqtaldy. Qazirgi tańda mal urlaý faktisi boıynsha sot aldy tergeý amaldary bastaldy. Almaty oblystyq polıtsııa departamenti baspasóz qyzmetiniń málimetinshe, kúdikti qamaýǵa alyndy.
12 naýryzdan beri Almaty oblysy aýmaǵynda mal urlyǵy boıynsha jedel izdestirý sharasy júrip jatyr. Osy ýaqyt aralyǵynda 89 mal urlaý deregi ashyldy. 34 qylmystyń aldyńǵy jyldary jasalǵany anyqtaldy.
Sharýalarǵa urlanǵan 60 bastan astam mal qaıtaryldy. Barlyq baǵyttaǵy joldarda arnaıy beketter qoıylyp, mal tasyǵan kólikter tekserildi. Nátıjesinde úı janýarlaryn qujatsyz tasymaldaǵan 323 fakti tirkeldi.
