Almaty oblysynda koronavırýsten ókpesi 95 paıyz qabynǵan júkti áıel aman-esen bosandy
TALDYQORǴAN. QazAqparat - Almaty oblysynda koronavırýspen aýyryp, ókpesi 95 paıyz qabynǵan júkti áıel aman-esen bosandy, - dep habarlaıdy QazAqparat tilshisi.
Jaǵdaıy óte aýyr halde bolǵan alakóldik Juldyz Nurǵalıeva sanavıatsııamen Taldyqorǵanǵa jetkizilgen.
«Ol 9 sáýirde ashylǵan Taldyqorǵan qalasyndaǵy perınataldy ortalyqtyń koronavırýstyq ınfektsııasy jáne polısegmentti pnevmonııasy bar júkti jáne bosanatyn áıelderge arnalǵan ınfektsııalyq bólimge tústi. Ókpesi 95 paıyzǵa deıin qabynǵan júkti áıelge der kezinde kesir tiligi jasalyp, reanımatsııalyq bólimge jatqyzyldy. Ana men balanyń ómirine arasha túsken medıtsına qyzmetkerleriniń arqasynda ómirge deni saý shaqalaq keldi. Otadan keıin kelinshek bir aı boıy ınfektsııalyq bólimde, al jańa týylǵan náreste perınataldy ortalyq dárigerleriniń qadaǵalaýynda boldy», - dedi Almaty oblystyq Densaýlyq saqtaý basqarmasyndaǵy baspasóz qyzmetiniń resmı ókili Láılim Áýbákirova.
Almaty oblystyq densaýlyq saqtaý basqarmasynyń basshysy Ómirzaq Nııazbekovtyń aıtýynsha, Juldyz Nurǵalıeva sáýir aıynyń 27-nen mamyrdyń 24-ine deıin aýrýhanada jatqan.
Jas ana mamyrdyń 24-i kúni aýrýhanadan aman-esen shyqty. Bir aı boıy dertimen arpalysqan ana aýrýhanadan shyǵar kúni alǵash ret balasyn qolyna aldy.
«Maǵan ekinshi ret ómir syılaǵan barlyq dárigerdiń aldynda basymdy ıemin. Olar óz isin jetik biletin, jaýapkershiligi mol, naǵyz gıppokrat antyna adal jandar. Oblystyq aýrýhananyń bas dárigeri Anarbek Mongol mundaǵy ár naýqastyń jaǵdaıy úshin alańdap, kún- tún demeı ózi kelip tekserip júrgeniniń ózi dertti jeńip shyǵýǵa úlken kúsh berdi desem bolady. Sondaı-aq, perınataldy ortalyqtyń bas dárigeri Qanat Jumashevqa da alǵysymdy bildiremin. Sondaı-aq renanımatolog-dáriger Azız Sadyqovqa, anestızıolog-lárigerler Berikjan Ýálıevke, Gúljan Botalbaevaǵa, Áset Ensınge úlken rahmet. Dárigerlerdiń arqasynda qolyma balamdy alyp, aman-esen úıge oralýdamyn», - dedi. Juldyz Nurǵalıeva.
