Almaty oblysynda koronavırýstan 70 jastaǵy qart jazyldy
TALDYQORǴAN. QazAqparat - Búgin Almaty oblystyq kópsalaly balalar aýrýhanasynyń ınfektsııalyq bóliminen 70 jastaǵy áıel Balaǵan Bekzathan koronovırýs ınfektsııasynan tolyq jazylyp, úıine shyǵaryldy, dep habarlaıdy QazAqparat tilshisi.
Naýqas statsıonarǵa 23 mamyrda jetkizilgen. 8 bala tárbılep ósirgen ana Eskeldi aýdanynyń turǵyny.
Atalǵan aýrýhananyń bas dárigeri Dosqalıev Marat Qanatuly patsıenttiń aýyr jaǵdaıda túskenin aıtty.
«Patsıent aýrýhanaǵa aýyr jaǵdaıda tústi. Birden ıntensıvti terapııa palatasyna jatqyzyldy. Naýqasty emdeý tásiline qatysty elordadaǵy reanımatolog-dárigerlermen únemi keńesip otyrdyq. Óıtkeni koronavırýs ınfektsııasy egde jastaǵy adamdardyń aǵzasyndaǵy basqa da sozylmaly aýrýlardy qozdyrady. Sondyqtan reanımatolog-dárigerler 24 saǵat boıy naýqasty qatań baqylaýda ustady. Dárigerlerdiń 16 kún boıyna úzdiksiz em júrgizýiniń arqasynda tolyq emdelip shyqty», - dedi bas dáriger.
Koronavırýs ınfektsııasynan aıyqqan qart ana dárigerlerge sheksiz alǵysyn bildirdi.
