Almaty oblysynda koronavırýspen betpe-bet kelgen medqyzmetkerlerge arnalǵan alleıa ashyldy
Іndet kezinde 900 ge jýyq medıtsına qyzmetkeri koronavırýspen aýyryp, 14 medıtsına qyzmetkeri kóz jumǵan.
Almaty oblysynyń ortalyǵynda ashylǵan alleıa «Aıaýly alaqan» dep atalady.
Jetisýdyń bas shahary Taldyqorǵan qalasynyń oblys ortalyǵy mártebesin alǵanyna 20 jyl tolýyna oraı, qalanyń kórkine-kórik qosatyn taǵy bir jer oryn tepti. Bul mekende aq halatty abzal jandarǵa degen alǵystyń nyshany retinde «Aıaýly alaqan» músini qoıylǵan. Joba avtory - Almaty oblysynyń ákimi Amandyq Batalov.
Músinde adamzattyń qos alaqany beınelengen. Al eki ýystyń arasynda japyraǵy jaıqalǵan jas aǵash ósip tur. Bul jan jylýynyń ár tirshilik ıesine ómir syılaı alatynyn beınelep turǵan erekshe sáýlet óneri.
Aımaq basshysy Amandyq Batalov, «atalǵan eskertkish adam ómiriniń arashasy bolǵan jandarǵa degen sheksiz rızashylyqtyń belgisi retinde máńgige óziniń mańyzdylyǵyn joǵaltpaıtynyn» atap ótti.
«Pandemııanyń alǵashqy kúnderinen-aq Elbasy úndeýimen elimiz birigip, indetti jeńýge jumyldy. Qıyn jaǵdaıda aldyńǵy qatarda kúresken – medıtsına qyzmetkerleri boldy. Búgingi ashylǵan «Aıaýly alaqan» eskertkish – asa qaýipti indetpen betpe-bet kelgen medıtsına salasy qyzmetkerleriniń qurmetine arnalady. Bul – jahandyq dertke qarsy kúresken aq halatty jandarǵa degen el qurmetiniń belgisi. Sondaı-aq, halyqtyń adal perzentterine ystyq yqylasynyń kórinisi. Eskertkish el basyna qıyndyq týǵan sátte qaharmandyq kórsetken jandardyń rýhyna taǵzym etý ornyna aınalady»,- dedi Amandyq Ǵabbasuly.
Alleıanyń ashylý saltanatynda sóz alǵan oblys ákimi Jetisý ólkesinde pandemııa kezinde atqarylǵan jumystardyń birqataryna sholý jasady.
Barshaǵa málim, oblysynyń Densaýlyq saqtaý júıesi birneshe aıdan beri damylsyz jumys istep keledi. Pandemııamen kúreske 31 medıtsınalyq uıym jumyldyryldy, onyń ishinde 4-i Taldyqorǵan qalasynda ornalasqan. Ambýlatorııalyq jáne statsıonarlyq deńgeıde úsh jarym myńǵa jýyq (3455) medıtsına qyzmetkeri, onyń ishinde 851 dáriger jáne 2604 kishi jáne orta býyn dárigerleri tartyldy. Pandemııamen kúreske jergilikti bıýdjetten barlyǵy 13,8 mlrd teńge bólindi, medıtsınalyq jabdyqtarmen jaraqtandyrý 79-dan 90 paıyzǵa deıin ósti. Al, pandemııa bastalǵannan beri koronavırýs pen pnevmonııadan 51 myńnan astam adam jazylyp shyqty.
Negizi músin «Shyǵys» shaǵyn aýdanynda, modýldik juqpaly aýrýlar aýrýhanasynyń janynda ornatyldy. Músinniń bıiktigi 1,2 m, uzyndyǵy 3,8 m, eni 2,8 m, ol qoladan jasalǵan.
Aıta keteıik, oblystyq «Jetisy Media» KMM Taldyqorǵan qalasynyń oblys ortalyǵy mártebesin alǵanyna 20 jyl tolýyna oraı erlik isterimnen erekshelengen Taldyqorǵannyń batyrlary týraly beınerolık túsirdi, Vıdeoda óz ómirin qaterge tigip, ózgeniń ómirin saqtap qalǵan adamdar beınelengen.
