Almaty oblysynda koronavırýs juqtyrǵan azamat 11 adammen qarym-qatynasta bolǵan

«Almaty oblysynda koronavırýs jaǵdaıy 20 naýryz kúni tirkeldi. Naýqas saǵat 10:45 mınýt ketkende Qarasaı aýdandyq aýrýhanasyna telefon soǵyp, dene qyzýynyń kóterilgeni jaıly habarlaǵan. Sonyń arqasynda saǵat 11:30 mınýtta dárigerler ınfektsııalyq aýrýhanaǵa oqshaýlady. Birden em bastaldy. Búgingi kúnde onyń densaýlyǵy ortasha. Qurǵaq jóteli, kishkene dene qyzýy áli de saqtalady. Onyń júrgen jolyn teksergende, 17 naýryz kúni Saýd-Arabııasynan Ystambul arqyly Bishkekke ushyp kelgendigi anyqtaldy. Bishkek kedeninen jaıaý ótip, taksımen Almatyǵa kelgen. Taksıde ózimen birge taǵy 3 azamat bolǵan. Almatyda ony dostary kútip alady. Ol jerde bir kún bolyp, sodan keıin Jambyl oblysyna Shý qalasyna óziniń otbasyna barǵan. Ol jaqta bir kún bolyp, Almaty oblysyna Qarasaı aýdanyna kelgen. Qarasaı aýdanynda ózi jalǵyz turady. Teksere kele bul adamnyń 11 adammen qarym-qatynasta bolǵany anyqtaldy. Olardyń barlyǵy oqshaýlanyp, aýrýhanalarǵa jatqyzyldy», - dedi Taldyqorǵanda ótken brıfnng barysynda Almaty oblystyq Densaýlyq saqtaý basqarmasynyń basshysy Baýyrjan Ysqaq.

Aıta keteıik, buǵan deıin QR Densaýlyq saqtaý mınıstrligi Almaty oblysynda koronavırýs juqtyrýdyń 1 oqıǵasy tirkelgenin habarlaǵan bolatyn. Osy ýaqytta indetke shaldyqqandar sany el boıynsha 53 adamǵa jetti.