Almaty oblysynda koronavırýs ınfektsııasynyń úsh oshaǵy bar

TALDYQORǴAN. QazAqparat - Epıdemıologııalyq jaǵdaıdyń kúrt ózgerýine baılanysty Kegen, Talǵar aýdandarynda, sondaı-aq Taldyqorǵan qalasynda karantın rejımi kúsheıtildi, dep habarlaıdy QazAqparat tilshisi.

Bul týraly «Jetisy media» aqparat alańynda Almaty oblysy densaýlyq saqtaý basqarmasynyń basshysy Baýyrjan Ysqaq málimdedi. Onyń aıtýynsha, indet juqtyrýdyń jańa jaǵdaılary osy óńirlerde tirkelgen. Osyǵan sáıkes saqtyq sharalary qaıtadan kúsheıtilip otyr.

«Búgingi tańda Almaty oblysynda koronavırýspen aýyrǵandar sany 212-ge jetti. Onyń ishinde 73 patsıent statsıonarlyq emdelýde. Naýqastarmen 2254 adam baılanysta bolǵan. Olardyń barlyǵy medıtsınalyq baqylaýǵa alyndy. Epıdemıologııalyq zertteý júrgizilip jatyr. Qazirgi ýaqytta koronavırýs ınfektsııasynyń belsendi 3 oshaǵy bar. Bul - Talǵar, Kegen aýdandary men Taldyqorǵan qalasy. Demek, karantın sharalary kúsheıedi», – dep atap ótti Baýyrjan Ysqaq.

Kúrdeli epıdemıologııalyq jaǵdaıǵa qaramastan, Almaty oblysynda karantındi kezeń-kezeńmen jeńildetý jalǵasýda.

Sonymen, 18 mamyrdan bastap oblystyń bas memlekettik sanıtar dárigeriniń jańa qaýlysyna sáıkes, blokpostar alynyp, mańyzdy nysandar jumysqa kirisedi.