Almaty oblysynda kópqabatty úıdiń balkonynda marıhýana ósirgen azamat ustaldy
TALDYQORǴAN. QazAqparat - Almaty oblysyndaǵy Tekeli qalasynyń polıtseıleri óz páterinde quramynda esirtki bar ósimdik ósirýmen aınalysqan 40 jastaǵy azamatty ustady, dep habarlaıdy QazAqparat tilshisi.
Almaty oblysy PD baspasóz qyzmetiniń málimetinshe, atalǵan derek óńirde júrip jatqan «Dopıng» jedel aldyn alý is-sharasy aıasynda anyqtalǵan. Kúdikti buǵan deıin urlyq jasaǵany jáne esirtkiniń zańsyz aınalymyna qatysy bolǵany úshin birneshe márte qylmystyq jaýapkershilikke tartylǵan.
«Kúdikti azamat januıasymen birge kópqabatty úıdiń úshinshi qabatynda turady. Onyń páterine sanktsııalanǵan tekserý júrgizý barysynda balkonnan ósirýge jáne baptaýǵa tyıym salynǵan marıhýananyń zańsyz ósindileri tabyldy. Esirtki tektes ósimdikterdi ósirýge qarapaıym gúl ósiretin ydystar paıdalanylǵan. Ustalǵan azamattyń úıinen jalpy sany 100 túp zańsyz óskin tárkilendi»,- dep málimdedi atalǵan vedomstvo qyzmetinen.
Tyıym salynǵan ósimdikti baptap ósirý deregi boıynsha sotqa deıingi tergeý amaldary júrgizilýde. Tergeý kezinde kúdikti mekenjaıyn ózgertpeý týraly mindettememen úıine jiberildi.
«Bıyl oblystyq tártip saqshylary esirtki zattarynyń zańsyz aınalymynan 400 kılogramǵa jýyq ártúrli esirtkini tárkiledi. Olardyń ishinde marıhýana, gashısh jáne geroın bar»,- dep tolyqtyrdy polıtseıler.
