Almaty oblysynda kópbalaly otbasylarǵa 2 kópqabatty úı salynady

TALDYQORǴAN. QazAqparat - Almaty oblysynda kópbalaly otbasylarǵa arnalǵan 2 kópqabatty úıdi jobalaý jumystary bastaldy. Bul týraly óńir basshysy Amandyq Batalov turǵyndar aldynda jasaǵan esebinde baıandady, dep habarlaıdy QazAqparat tilshisi.

«7-20-25» baǵdarlamasy aıasynda kópbalaly analarǵa 1 mln teńgelik turǵyn úı sertıfıkattary bólinetin boldy. Óńir basshysy sondaı-aq kópbalaly jáne az qamtylǵan otbasylarǵa tabıǵı gazǵa qosylýǵa jeńildikter qarastyrylyp, 16 myń jeke úıge ýly gazdy anyqtaıtyn qurylǵylar ornatylatynyn aıtty.

«Munan bólek jaǵdaıy tómen otbasylardyń balalary 100 paıyz mektepte tegin ystyq tamaqpen qamtylatyn bolady. Sonymen qatar kópbalaly jáne áleýmettik jaǵynan az qamtylǵan otbasydan shyqqan mektep bitirýshilerge joǵary oqý oryndaryna 100 grant bólinedi. Qazirgi tańda osyndaı grantpen 246 stýdent bilim alýda. Kópbalaly analardyń qoǵamdyq kólikte tegin júrý máselesi qaralyp jatyr», - dedi Amandyq Batalov halyq aldynda bergen esebinde.