Almaty oblysynda kópbalaly ana 14-shi sábıin dúnıege ákeldi

ALMATY. QazAqparat - Almaty oblysy Kerbulaq aýdanynda altyn qursaqty «Batyr ana» Gúlnáz Jeńisbaıqyzy 14-shi sábıin dúnıege ákeldi. Otbasyn osy qýanyshymen aýdan ákimi Ǵalıasqar Sarybaev quttyqtady. Atap ótsek, bul otbasyǵa 2019 jyly Saryózek aýylynan kóp balaly sanatymen turǵyn úı berilgen bolatyn, dep habarlaıdy Almaty oblysy ákiminiń baspasóz qyzmeti.

Sársenbaı Sadýaqasov pen Gúlnaz Jeńisbaıqyzynyń shańyraq kótergenine 27 jyl bolǵan. Búginde olar 10 qyz 4 ul tárbıelep otyr, 3 nemere kórdi.

Kerbulaq aýdandyq ákimdiginiń málimetine súıensek, mektep qabyrǵasyndaǵy bes bala oqý quraldarymen, sporttyq kıimmen, mektep formasymen tolyq qamtamasyz etilgen, úsheýi balabaqsha jasynda. Onlaın oqýlaryna qajetti noýtbýk te mektepten berilgen. Qyzy Aıjan sporttyń erejesiz jekpe-jek túrine qatysyp, júldeli oryndarǵa ıe bolyp júr. Otaǵasy mashınıst, mehanık, dánekerleýshi sııaqty kásipterdi erkin meńgergen.

«Ómirdiń máni de, sáni de - bala. Densaýlyǵym jetse, bala týýdan qashpaımyn. Qazaq «balany jastan» degendi beker aıtpaǵan. Úlken qyzym muǵalim. «Aldyńǵy arba qaıda barsa, sońǵy arba sonda júredi» deıdi, sondyqtan aldyńǵy ul-qyzdardy jaqsy tárbıeleseń, sońǵylary solarǵa eliktep, úlgi etip ósedi dep oılaımyn«, - deıdi Gúlnáz Jeńisbaıqyzy.

Eske salsaq, jalpy Almaty oblysynda kóp balaly otbasylaryna qajetti kómek kórsetý jolǵa qoıylǵan. Ótken jyly 2 395 otbasyna turǵyn úı berilse, sonyń 1 258-i áleýmettik áljýaz jáne kóp balaly otbasylar, bul qatarda 180 otbasy metsenattardyń qoldaýymen úıli bolǵanyn da atap ótý kerek.

Sol sııaqty oblys ortalyǵy Taldyqorǵanda kóp balaly analar jumys isteıtin tigin tsehyn ashý qolǵa alynǵan. Qazirgi kezde tseh ornalasatyn oryn jóndeýden ótkizilip, daıyndalý ústinde. Jalpy bıylǵy jyldyń 1 sáýirine ataýly áleýmettik kómek 14761 otbasyna 2 mlrd. 103,9 mln. teńge kóleminde taǵaıyndalǵan, onyń ishinde az qamtylǵan kóp balaly otbasylar da bar.