Almaty oblysynda kóne qalalardyń arheologııalyq qazba jumystary jalǵasýda
TALDYQORǴAN.QazAqparat - Almaty oblysynda Sheńgeldi jáne Qyrǵaýyldy aýyldarynyń aýmaǵynda kóne qalalardyń arheologııalyq qazba jumystary júrip jatyr. Oǵan oblys bıýdjetinen 17 mln. teńge baǵyttalǵan, dep habarlaıdy QazAqparat tilshisi.
Oǵan qosa taıaý arada Sarqan aýdanyndaǵy «Qoılyq», Eskeldi aýdanyndaǵy «Eshkiólmes» petroglıfterine, Jambyl aýdanyndaǵy «Burǵan saq» pen «Tańbalytas» qorǵandaryna arheologııalyq zertteý bastalady. Bul týraly oblys ákimi Amandyq Batalov Ortalyq kommýnıkatsııalar qyzmetinde ótkizgen brıfıng barysynda málim etti.
«Almaty oblystyq Qazaqstan halqy Assambleıasy men Іlııas Jansúgirov atyndaǵy Jetisý memlekettik ýnıversıtetiniń jáne óńirdegi ólketanýshy, geograf, tarıhshy ǵalymdardyń birlesken «Rýhy bekem, kıeli meken - Jetisý» ǵylymı-tanymdyq ekspedıtsııasyna 5 myńnan astam adam tartyldy. Oblystaǵy kıeli oryndar týraly el ishinen jınaqtalǵan ańyzdar men áńgimeler, fotomaterıaldar eki tomdyqty qurap, jumystyń nátıjesin kórsetti. Birinshi tomy oqyrmandarǵa jol tartsa, ekinshi tomy erteń bastalǵaly otyrǵan ekspedıtsııanyń qorytyndysynda shyǵarylatyn bolady», - dedi Amandyq Batalov.
Sonymen qatar bıylǵy jyldyń irgeli sharasy retinde Shoqan Ýálıhanovtyń Qashqarııaǵa barǵan jolymen júretin ǵylymı-tanymdyq «Shoqan izimen» ekspedıtsııasyn jáne QHR-ǵa «Muqalı» medıa-ekspedıtsııasyn ataýǵa bolady.
