Almaty oblysynda kompanııa 7 balaly anaǵa úı alyp berdi

TALDYQORǴAN. QazAqparat - Tekeli qalasynyń turǵyny, 7 balanyń anasy Nazgúl Kójekeevaǵa «ASPMK-19» JShS tórt bólmeli úı alyp berdi. Jalǵyz basty ana buǵan deıin páter jaldap turǵan, - dep habarlaıdy QazAqparat tilshisi.

Nazgúldiń eń úlken balasy - Aıbol 10 jasta, al kishkentaıy 8 aılyq. Tórt balasy mektepte oqıtyn ana baspana taýqymetin ábden tartqanyn aıtady.

«Páterden páterge kóship júrgenimizge on jyldan asty. Kópbalaly ana bolǵandyqtan, kóp adamdar úılerin bizge jalǵa bergileri kelmeıdi. Bir jyldan asty joldasymyz ekeýimiz bólek turamyz. Óıtkeni ol balalardy asyraýdy qoıdy, jumys istemedi. Qýanyshymda shek joq. Mektep te týra úıimizdiń janynda eken. Endi balalarymnyń jatar orny, óz úıleri bar. Birinshiden osyndaı qamqorlyqty jasaýǵa uıytqy bolǵan Tekeli qalasynyń ákimi Baqtııar Ónerbaevqa shynaıy alǵysymdy bildiremin»,- dedi Nazgúl Kójekeeva.

Balalarynyń járdemaqysymen kúneltip júrgen áıel qazir «Kúmis alqa» ıegeri. Kenjesi 1 jasqa tolǵanda «Altyn alqaǵa» qujattaryn ótkizedi. 37 jastaǵy Nazgúl Kójekeevaǵa memleketten beriletin ataýly áleýmettik kómektiń de kólemi ósti. Máselen, ol buǵan deıin 76 myń teńge alsa, endi 1 sáýirden bastap jeti balasyna 165 myń teńge alatyn bolady.

Tekelide 415 kópbalaly otbasy bar. Olardyń 170-niń baspanasy joq. Qalanyń ákimi Baqtııar Ónerbaevtyń sózinshe, mamyr aıynda kásipkerler taǵy bir otbasyǵa baspana alyp beredi.

«Osy jaqynda ǵana jergilikti iri kásipkerlermen kezdesip, arnaıy qor quryldy. Ol jerge túsken barlyq qaıyrymdylyq qarjysy jaǵdaıy tómen otbasylardyń ál-aýqatyn kóterýge baǵyttalady. Kásipkerlerdiń qoldaýynyń nátıjesinde, mundaı ıgi isterdi biz jalǵastyra beremiz», - dedi Tekeli qalasynyń ákimi Baqtııar Ónerbaev.