Almaty oblysynda kólikti mas kúıde aıdaǵan eki júrgizýshi ustaldy
TALDYQORǴAN. QazAqparat - Almaty oblysynda karantın engen túni, ıaǵnı keshe óńir boıynsha jol ústinde masań kúıde kólik aıdaǵan eki júrgizýshi ustaldy. Oqıǵanyń biri oblys ortalyǵynda, ekinshisi Uzynaǵash aýylynda tirkeldi, dep habarlaıdy QazAqparat tilshisi.
«Barlyq júrgizýshilerdegi tıisti qujattardyń bolýyn jáne olardyń karantındik rejımdi saqtaýyn tekserý barysynda, tún jarymynda «Toıota Kamrı» avtomobıliniń rýlinde bolǵan jáne buǵan deıin kólik quralyn basqarý quqyǵynan aıyrylǵan Taldyqorǵan qalasynyń 25 jastaǵy turǵyny ustaldy.
Ekinshi oqıǵa Jambyl aýdanynyń Uzynaǵash aýylynda tirkelgen. «Sýbarý Legası» avtokóligin toqtatqannan keıin, atalǵan kólik júrgizýshisiniń Qaınazar aýylynyń masań kúıdegi 38 jastaǵy turǵyny ekendigi anyqtaldy. Eki júrgizýshi de narkologııalyq saraptamadan ótkizildi», - dedi Taldyqorǵan qalalyq polıtsııa basqarmasynyń bastyǵy polıtsııa polkovnıgi Asqar Nursapa.
Atalǵan derekter QR QK 346-babynyń 1-bóligine sáıkes sotqa deıingi tergeýdiń biryńǵaı tiziliminde tirkeldi.
«Kólik quraldary aıyp turaǵyna qoıyldy. Ustalǵan azamattar meken-jaıyn ózgertpeý týraly qolhatpen bosatylyp, sotqa deıingi tergeý materıaldary sotqa jiberildi», - dep tolyqtyrdy polkovnık A.Nursapa.
Esterińizge sala keteıik, Almaty oblysynda 15 sáýirden bastap karantın engizildi.
