Almaty oblysynda kólik urlaýdy kásip qylǵan 17 jasar bozbala ustaldy
TALDYQORǴAN. QazAqparat - Almaty oblysynyń tártip saqshylary oblys ortalyǵynda kópqabatty úılerdiń aýlasynan «Toyota Windom» jáne «Volkswagen Passat» avtokólikteriniń qoldy bolýyna qatysy bar degen kúdikpen 17 jasar jasóspirimdi ustady, dep habarlaıdy QazAqparat tilshisi.
Kúdikke ilingen bala Almaty qalasyndaǵy Jasóspirimderdi beıimdeý ortalyǵyna ornalastyryldy.
Tamyz aıynyń ortasynda Taldyqorǵan qalasyndaǵy kópqabatty úılerdiń biriniń aýlasynda turǵan Toıota avtokóligin belgisiz bireýler urlap áketken bolatyn. Arasyna 6 kún salyp túnde «Volkswagen Passat» kóligi de urlanǵan.
Atalǵan qylmystardy ashý maqsatynda tájirıbeli iz kesýshilerden qurylǵan top keń aýqymdy jumys atqardy. Kásibı mamandar bultartpas derekter jınap, Almaty qalasyndaǵy áriptesterimen birlese otyryp, qylmysqa qatysy bar degen kúdikpen 17 jastaǵy jasóspirimdi Almaty qalasynan ustady.
«Ustalǵan kúdikti Taldyqorǵan qalasynyń 17 jastaǵy turǵyny bolyp shyqty. Ol byltyr osyndaı qylmys jasaǵany úshin shartty jazaǵa kesilgen bolatyn. Onyń Almaty qalasynda da osyǵan uqsas qylmystarǵa qatysy bar-joǵy anyqtalyp jatyr. Osyǵan oraı qylmystyq is materıaldary Almaty qalasyndaǵy áriptesterimizge jiberilip, is biriktirildi. Qoldy bolǵan kólikter Almaty qalasynan tabyldy jáne tárkilendi»,- deıdi Taldyqorǵan qalasynyń polıtsııa basqarmasy bastyǵynyń orynbasary, polıtsııa polkovnıgi Baýyrjan Tilekbaev.
Qylmysqa qatysy bar kúdiktiniń jasy eskerile otyryp, ol jasóspirimderdi beıimdeý ortalyǵyna ornalastyryldy.
Almaty qalasynyń tártip saqshylary teris jolǵa túsken bozbalanyń budan basqa da zańbuzýshylyqtarǵa qatysy bar-joǵyn muqııat tekseredi.
