Almaty oblysynda kólik urlap bara jatqan kúdikti jol ústinde ustaldy
TALDYQORǴAN. QazAqparat - Almaty oblysynda «Mark-2» markaly mashınany urlap bara jatqan kúdikti jol ústinde qolǵa tústi, dep habarlaıdy QazAqparat tilshisi.
Anyqtalǵandaı, 21 jastaǵy jigit avtomobıldi Almaty qalasynan qoldy etip, birneshe saǵattyń ishinde ustalyp qaldy.
«Avtokólik júrgizýshisi jol erejesin buzyp, tártipke baǵynbaı toqtamaı ketti. Kúdiktiniń izine polıtsııa qyzmetkerleri túsip, júrgizýshini toqtatty. Belgili bolǵandaı, mashına birneshe saǵat buryn Almaty qalasyndaǵy Almaly aýdanynan urlanǵan bolyp shyqty. Al júrgizýshi kólikti Jambyl oblysyna apara jatqan. Kóliktiń tizginindegi jigit ustalyp, jaqyn mańdaǵy ishki ister bólimine jetkizildi jáne ol Almaty qalasyndaǵy Almaly aýdanynyń tártip saqshylaryna kóligimen birge tabystalatyn bolady»,- dep málim etti Almaty oblystyq ІІD baspasóz qyzmeti.
Atalǵan vedomstva tolyqtyrǵandaı, kúdikti osydan bir apta buryn Almatyda urlanǵan «Mıttsýbısı Padjero» kóliginiń urlyǵyna da qatysy bar bolyp shyǵypty. Tergeý barysynda anyqtalǵandaı, kúdikti bul mashıany da Jambyl oblysyna jetkizbek bolǵan. Biraq, kólikten jolda aqaý shyǵyp, ony Almaty oblysynyń aýmaǵyndaǵy joldyń boıyna qaldyryp ketken.
