Almaty oblysynda kólik urlaǵan boıjetken ustaldy
TALDYQORǴAN. QazAqparat - Almaty oblysynda sońǵy táýlikte ózgeniń kóligin aıdap ketken úsh kúdikti ustaldy. Urlanǵan avtokólikter ıelerine qaıtaryldy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, atalǵan eki fakti Qarasaı aýdanynda, endi biri Panfılov aýdanynda tirkelgen.
«Qarasaıdaǵy Bereke jáne Eńbekshi aýyldarynan «Folksvagen polo» jáne «Mazda-626» kólikteri, al Panfılov aýdanyndaǵy Sholaqaı aýylynan «VAZ-2107» markaly mashınany aıdap ketken. Tártip saqshylardyń jedel-izdestirý jumystarynyń nátıjesinde avtokólikter men ony aıdap ketken kúdiktiler ustalyp, polıtsııa bólimshesine jetkizildi», - delingen vedomstvonyń taratqan aqparatynda.
Іs materıalyna sáıkes, kúdiktiniń ekeýi 29 jáne 45 jastaǵy azamattar, endi biri - jas qyz. Sondaı-aq, polıtsııa ókilderiniń málimetinshe, jyl basynan beri urlanǵan 150 kólik ıelerine qaıtarylyp, 127 adam jaýapkershilikke tartylǵan.
