Almaty oblysynda kólik apatynan 2 adam mert boldy
TALDYQORǴAN. QazAqparat - Almaty oblysynda kólik apatynan júrgizýshi men jolaýshy mert boldy. Taǵy bir kóliktiń júrgizýshisi túrli dene jaraqatymen aýrýhanaǵa jetkizildi, dep habarlaıdy QazAqparat tilshisi.
Almaty oblystyq Polıtsııa departamentiniń baspasóz qyzmetinen málim etkendeı, oqıǵa búgin tańǵy saǵat 07:00 shamasynda bolǵan. «Almaty-Kókpek-Kóktal» tasjolynyń 38-shaqyrymynda «Kia Rio» kóliginiń 34 jastaǵy júrgizýshisi rýlge ıe bola almaı qalyp, qarsy baǵytqa shyǵyp ketken. Onda «Toyota Carina»-men soǵylǵan. Saldarynan «Kia Rio»-nyń 28 jastaǵy jolaýshysy oqıǵa ornynda kóz jumdy, osy kóliktiń júrgizýshisi aýrýhanada mert boldy.
«Toyota Carina» mashınasynyń 54 jastaǵy júrgizýshisi túrli dene jaraqatymen Eńbekshiqazaq aýdanynyń ortalyq aýrýhanasyna jetkizildi.
Atalǵan kólik apaty boıynsha QR QK-niń 345-babymen sotqa deıingi tergeý bastaldy.
