Almaty oblysynda kóligimen adam qaǵyp óltirip, qashyp ketken kúdikti ustaldy
TALDYQORǴAN. QazAqparat - Almaty oblysy Raıymbek aýdanynyń Jalańash aýyly mańynda jaıaý júrginshini kóligimen qaǵyp, oqıǵa ornynynan qashyp ketken kúdikti ustaldy. Qazir Almaty qalasynyń 52 jastaǵy turǵynynyń ústinen Qylmystyq kodekstiń eki baby boıynsha is qozǵalyp, tergelip jatyr, dep habarlaıdy QazAqparat tilshisi.
Oblystyq polıtsııa qyzmeti atalǵan faktini rastady.
«Raıymbek aýdanynyń polıtseıleri oblystaǵy izdeý bólimindegi áriptesterimen birigip, kúdikti «Nissan Patrol» markaly kólik mingenin anyqtap, ony Qapshaǵaı qalasynan tapty. Kóliktiń júrgizýshisi Almaty qalasynyń 52 jastaǵy turǵyny bolyp shyqty. Kúdikti ustaldy. Qazir atalǵan fakti boıynsha sot-aldy tergeý bastalyp, qajetti sot-medıtsınalyq saraptamalar taǵaıyndaldy», - dep málim etti oblystyq ІІD baspasóz qyzmeti.
Oblystyq polıtsııa qyzmeti kúdiktiniń ústinen QR QK 345-babymen qosa, Qylmystyq kodekstiń 347-baby, ıaǵnı «Jol-kólik oqıǵasy bolǵan jerden ketip qalý» baby boıynsha da is qozǵalǵanyn jetkizdi.
Adam ólimimen aıaqtalǵan oqıǵa Almaty oblystyq Іshki Іster departamentiniń Anyqtaý basqarmasynyń qatań baqylaýynda ekenin atap ótti vedomstvo ókilderi.
Aıta ketý kerek, 12 tamyz kúni Raıymbek aýdanynyń Jalańash aýylynyń mańyndaǵy avtojolda jol-kólik oqıǵasynan mert bolǵan 49 jastaǵy jaıaý júrginshi, ıaǵnı jergilikti turǵynnyń denesi tabyldy. Kólik júrgizýshisi oqıǵa ornynan qashyp ketken.
