Almaty oblysynda kóligimen adam qaǵyp óltirgen kúdikti ustaldy
TALDYQORǴAN. QazAqparat - Almaty oblysyndaǵy Qaskeleńde kóligimen adam qaǵyp óltirgen kúdikti ustaldy, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, adamdy qaǵyp ketý deregi boıynsha Almaty oblysy PD Jergilikti polıtsııa qyzmeti izdestirý bólimshesiniń qyzmetkerleri «Lada 21144» kóliginiń júrgizýshisin anyqtady.
«Atalǵan kólik apaty 14 naýryz kúni Naýryzbaı batyr kóshesiniń boıymen ońtústik baǵytta bazarǵa qarama-qarsy tusta bolǵan. Belgisiz avtokólik joldy ruqsat etilmegen tustan qıyp ótken jaıaý júrginshini qaǵyp, oqıǵa ornynan iz sýytqan. Al, zardap shegýshi aýyr halde jol ústinde qalǵan. Dene jaraqatyn alǵan 33 jastaǵy jaıaý júrginshi túrli jaraqattar saldarynan aýrýhanada kóz jumdy. Biz qylmysqa qatysy bar kúdiktini izdestirý sharalaryn qolǵa aldyq», - dedi oblystyq PD Tergeý basqarmasynyń Jol-kólik apattaryn tergeý bóliminiń bastyǵy polıtsııa maıory Medet Aıazbaev.
Jedel ýákilder úshin jan-jaqty tekserý jumystaryn júrgizip, kúdiktini quryqtaý úshin bir kún qajet boldy. Jedel-izdestirý nátıjesinde kólik anyqtaldy jáne kólik apatyn jasaǵan júrgizýshi de ustaldy. Ol 2002 jyly týǵan azamat bolyp shyqty. Onyń bul qylmystan basqa birqatar quqyq buzýshylyq bar ekeni anyqtaldy.
«Tergeý barysynda kúdiktiniń atalǵan kólikti zańsyz júrgizgeni belgili boldy, onyń ústine ol kóligine jalǵan memlekettik tirkeý nómirin taǵyp alǵany da ashyldy. Jaıaý júrginshini qaǵyp ketken soń, ol qylmysyn jasyrý jáne jaýapkershilikten jaltarý maqsatynda jalǵan nómirdiń kózin joıǵan. Sonymen qatar, jol-kólik oqıǵasy kezinde kúdiktiniń avtokóliginde tórt jolaýshy bolǵan. Keıinirek olardy túsirip ketken», - dep tolyqtyrdy maıor M. Aıazbaev.
Atalǵan derek boıynsha QR Qylmystyq kodeksiniń birneshe baby boıynsha sotqa deıingi tergeý amaldary júrgizilip jatyr. Jol apatyn jasaǵan kólik arnaıy turaqqa toǵytyldy. tergeý barysynda tártip saqshylary jol-kólik apatynyń mán-jaıyn anyqtaıtyn bolady.
