Almaty oblysynda kóktemgi dala jumystary qyzý júrip jatyr
TALDYQORǴAN.QazAqparat - Bıyl Almaty oblysynda 938 myń gektarǵa aýyl sharýashylyǵy daqyldaryn sebý josparlanǵan, dep habarlaıdy QazAqparat tilshisi.
Máselen, bıyl bir ǵana Kerbulaq aýdany boıynsha 80 myń gektardan astam alqapqa dándi-daqyl egiledi. Qazir aýdandaǵy 21 sharýa qojalyǵy Úshbulaq kooperatıvine birikti. Nátıjesinde egis alqaby edáýir keńeıgen.
«Qazir 7 myń gektar jerge aýyspaly egistik tehnologııasy qoldanylýda. Buryn ár sharýashylyq óz jerinde daqyldyń bir túrin egýmen shekteldi. Budan topyraqtyń qunary tómendedi, ónim de az boldy. Qazir myna irilengenniń arqasynda biraz jerlerimizge shabyndyq dánin seýip otyrmyz. Kópjyldyq shóppen jerdi tyńaıtamyz», - deıdi kooperatıv tóraǵasy Aldan Bekeev.
Sharýalardyń aıtýynsha, birigý arqyly aýylsharýashylyǵy tehnıkasy eselenip, eskisin jańartýǵa da múmkindik týǵan.
Aıta ketý kerek, Almaty oblysy qant qyzylshasyn ósirýdi myqtap qolǵa aldy. Bıyl oblysta 9 myń gektar jerge tátti túbir sebiledi. Al mamyr aıynyń on besine deıin egý jumystary aıaqtalady dep kútilýde.
