Almaty oblysynda kisi óltirgen kúdikti bir jyldan astam ýaqyt boı tasalap júr
TALDYQORǴAN. QazAqparat - Almaty oblysynyń polıtsııasy adam óltirdi degen kúdikpen 53 jastaǵy er azamatty izdeýde. Ol bir jyldan astam ýaqyttan beri boı tasalap júr, dep habarlaıdy QazAqparat tilshisi oblystyq ІІD baspasóz qyzmetine silteme jasap.
2015 jyldyń 17 qarashasynda Іle aýdanynyń Túımebaev aýylynda 1976 jyly týǵan Reseı azamatshasy E.Shestopalovanyń máıiti tabylǵan. Tergeý barysynda onyń denesinen qınaý men zorlyq belgileri anyqtaldy.
«Jedel is-sharalar barysynda krımınaldy polıtsııa qyzmetkerleri qylmysty jasaǵan kúdiktini anyqtaǵan bolatyn. Ol buǵan deıin Kóksý aýdanynyń Mámbet aýylynda turyp kelgen, 1964 jyly týǵan Janbolat Jarqymbaev bolyp shyqty. Qazir QR Qylmystyq kodeksiniń «Kisi óltirý» baby boıynsha tergeý amaldary jalǵasýda, kúdikti izdestirilýde», - delingen oblystyq ІІD taratqan baspasóz baıanynda.
Іzdeý jarııalanǵan kúdiktiniń erekshe belgisiniń biri onyń sol qolynyń shynashaq saýsaǵy joq bolsa, oń qolynyń eki saýsaǵy búgilmeıdi.
«Qylmys jasady dep kúdik keltirilgen azamat fermer qojalyqtarynda baqtashy bolyp mal baǵýy, ne bolmasa qurylys alańdarynda ártúrli jumystarmen aınalysýy múmkin. Kúdikti týraly aqparat biletin azamattardyń 102 telefonyna dereý habarlasýyn suraımyz», delingen baspasóz baıanynda.
