Almaty oblysynda Kegen aýdany qurylǵaly jatyr
TALDYQORǴAN. QazAqparat - Almaty oblysynyń Raıymbek aýdany resmı túrde eki aýdanǵa bólinetin kún alys emes. Bul týraly óńir basshysy Amandyq Batalov halyq aldyndaǵy esebinde málimdedi, dep habarlaıdy QazAqparat tilshisi.
Byltyr oblystyq máslıhat sessııasynda Raıymbek aýdanyn Kegen jáne Raıymbek aýdandaryna bólý týraly sheshim qabyldandy. Sondaı-aq bul usynys Elbasynyń qatysýymen ótken jıynda qoldaý taýyp, maquldandy. Úkimet tarapynan oblys ákimi Amandyq Batalovqa barlyq shyǵyndardy eseptep, tıisti qujattardy retteý máselesi tapsyrylǵan bolatyn. Óńir basshysy qazirgi tańda qarjy jaǵy sheshilip, daıyndyq jumystary bastalyp ketkenin aıtty.
«Aýdandardy bólý úshin 2,4 mlrd teńgedeı qarjy qajet. Narynqol aýylynda kóshelerdi abattandyryp, aýyz sý máselesi sheshildi. Komıssııany jiberip, mekemelerge qandaı ǵımarattar kerek ekenin anyqtap aldyq. Sondaı aq Kegen aýdanynyń ortalyǵy Kegen jáne Raıymbek aýdanynyń ortalyǵy Narynqol aýyldary bolatyny naqtylandy. Qazirgi tańda Elbasy Nursultan Nazarbaevtyń qaýlysy shyǵýyn kútip otyrmyz», - dedi Almaty oblysynyń ákimi Amandyq Batalov.
