Almaty oblysynda «Qazaqstannyń úzdik taýary» baıqaýynyń jeńimpazdary anyqtaldy

Bıyl «Óndiristik maqsattaǵy úzdik taýarlar» atalymynda І oryndy «Jarkent krahmal-sirne zaýyty» JShS (Panfılov aýdany) ıelendi. ІІ oryndy «Polımermetall» JShS (Qapshaǵaı qalasy) aldy, al úshinshi oryn «Plast Invest Production» JShS-na (Jambyl aýdany) buıyrdy.

«Úzdik azyq-túlik taýarlary» atalymynda «Lepsınsk ónimderi» JShS (Alakól) birinshi oryn ıegeri atandy. ІІ oryndy «Shın Laın» JShS (Іle aýdany), ІІІ oryndy «Apple world» JShS (Eńbekshiqazaq aýdany) jeńip aldy.



«Halyq tutynatyn úzdik taýarlar» atalymynda І oryn ıegeri retinde «Abdı Ibrahım global farm» JShS tanyldy. Qurmetti ІІ oryndy «Suńqar Almaty qus fabrıkasy» JShS, ІІІ oryndy «GLASMAN» JShS (Talǵar aýdany) aldy.

Bıyl baıqaýǵa «Qyzmet kórsetetin úzdik kásiporyn» jańa atalymy engizildi. Atalmysh nomınatsııada І oryndy «Jemjýchına Semırechıa» JShS (Taldyqorǵan q.) ıelendi. ІІ oryndy «Irada balyq» JShS, ІІІ oryndy «Ahmedjanova» JK «INTELLECity» bilimdi damytý ortalyǵy aldy.

«Memleket basshysy bizdiń kásipkerlerdiń aldynda ónimniń sapasyn arttyrý, onyń halyqaralyq standarttarǵa sáıkes bolýy baǵytynda jańa mindetter qoıdy. Bul óz kezeginde qazirgi qyzý báseke kezinde tabys kepiline aınaldy. Sondyqtan, men otandyq taýar óndirýshilerimizge alǵys bildiremin. Sizderdiń arqalaryńyzda jańa kásiporyndar ashylýda, jańa ónim túrleri shyǵarylýda, jańa jumys oryndary paıda bolýda. Osynyń barlyǵy turaqtylyqtyń sharty, aımaq ekonomıkasynyń damýyna jańa serpin berip otyr», - dedi Amandyq Batalov.

Sonymen qatar, kásipkerlerdi Almaty oblysy Kásipkerler palatasynyń dırektory Lázzat Shyńǵysbaeva quttyqtap, kásipkerliktiń aımaq damýynda erekshe oryn alatynyn aıtty.



«Búgin barlyqtaryńyzdy jeńimpaz dep aıtýǵa bolady. Sebebi, osyǵan deıin Sizder ıdeıa taýyp, ony iske asyrý úshin tynymsyz eńbektendińizder. Únemi alańdaý men qobaljý boldy. Búgin bul ıdeıalaryńyz daıyn ónimge aınaldy, ony biz tutynamyz, kıip, paıdalanyp júrmiz. Osynyń ózi úlken jeńis! Elbasy «Made In Kazakhstan» brendin belsendi damytýdy tapsyrdy. Meniń oıymsha, bul sanatta Jetisý ónimderiniń shoqtyǵy bıik bolady», - dep atap ótti oblystyq palata basshysy.



Endi birinshi oryn ıegerleri «Qazaqstannyń úzdik taýary» baıqaýynyń respýblıkalyq kezeńine qatysatyn bolady.

Atap ótsek, Almaty oblysynda 700-den astam ónerkásip oryndary bar, olarda 30 myńnan astam turaqty jumys orny ashylǵan. 2016 jyly ónerkásip óniminiń kólemi 650 mlrd. teńgege jetip, sońǵy 5 jyl ishinde 1,5 esege artqan. Transulttyq kompanııalardyń qatysýymen 20-dan astam kásiporyn jumys isteıdi. 40-tan astam ónerkásip orny eksporttaýshy bolsa, olardyń ónimderi álemniń 42 eline tasymaldanady.