Almaty oblysynda qaza bolǵan polıtseılerdiń otbasyna 5 mln teńgeden beriledi
Keshe oblys ákimi Qanat Bozymbaev óńirdegi polıtsııa qyzmetkerlerimen kezdesip, olarǵa alǵysyn jetkizdi.
Kezdesý barysynda Q.Bozymbaev Prezıdent tapsyrmasymen jáne polıtsııa qyzmetkerleriniń jaýyngerlik rýhyn kóterý maqsatynda arnaıy kelgenin aıtty. Búlik kezinde barlyq salmaq kúshtik qurylymdardyń ıyǵyna túskenin, olardyń terrorlyq shabýyldarǵa qarsy oq pen ottyń ortasynda júrip el tynyshtyǵyn qorǵaǵandaryn rızashylyqpen atap ótti. Sol sııaqty qaza bolǵan qyzmetkerlerdiń otbasyna barlyq qajetti kómek kórsetiletinin jetkizdi.
«Eren erlikterińiz úshin Jetisý jurtshylyǵynyń atynan sizderge zor alǵys aıtamyn. Lańkestermen kúres kezinde birneshe polıtsııa qyzmetkeri qaza tapty. Zardap shekkender de kóp. Bul tek olardyń otbasylarynyń ǵana emes, barshamyzdyń ortaq qaıǵymyz. Memleket olardyń januıalaryn qıyndyqta jalǵyz qaldyrmaıdy. Biz olardy óz nazarymyzǵa alyp, qamqorlyq jasaımyz. Árbir qaza bolǵan azamattardyń otbasyna 5 mln teńgeden birjolǵy materıaldyq kómek kórsetiletin bolady. Balalarynyń oqý aqysyna kómektesip, basqa da qoldaý sharalary qarastyrylady», - dedi Qanat Bozymbaev.
Aldaǵy ýaqytta polıtsııa men arnaıy organdar qyzmetkerlerine jan-jaqty qoldaý kórsetýdiń keshendi sharalary qarastyrylatyn bolady. Sonyń ishinde olardyń statýsyn kóterý, shtat sanyn kóbeıtý, turǵyn úımen qamtý, kólik jáne basqa da materıaldyq tehnıkalyq qamtamasyz etý qolǵa alynady.
«Burynǵydaı emes, qazir halyqtyń sizderge degen kózqarasy ózgerdi. Ásirese, sońǵy eki-úsh kún ishinde kópshiliktiń polıtsııaǵa degen qurmeti artyp, olardyń qadirin túsindi. Búgingi kúni de óz mindetterińizdi laıyqty atqaryp, halyq kúzetinde tursyzdar. Qıyn kezeńde eren erlik kórsetken sizderdiń árqaısylaryńyzdy biz batyr dep bilemiz!» – dedi oblys basshysy.
Esterińizge sala keteıik, 9 jáne 10 qańtar kúni Almaty oblysynyń eki turǵyny jer qoınyna tapsyryldy. Olar Taldyqorǵanda qarýlanǵan terrorıstermen atys kezinde qaza tapqan LA-155/16 mekemesiniń aǵa baqylaýshysy Erbol Erjanov pen Almaty oblysy Polıtsııa departamentiniń jedel qımyldaý arnaıy jasaǵynyń ınspektory Darhan Barǵanaev. Olar Prezıdent jarlyǵymen «Aıbyn» ordenimen marapattaldy.
