Almaty oblysynda qaýipti medıtsınalyq qaldyqtar kúresinge ashyqtan-ashyq tastalǵan
Áleýmettik jelide taraǵan vıdeoda qoǵam belsendisi «Medıtsınalyq qaldyqtardy kúresinge tastaýǵa nege ruqsat bergen» degen suraq qoıady.
Vıdeo avtory ishinde synap bar qyzý ólshegish quraldyń kúresinde synyp jatqanyn, qoldanylǵan shprıtster men ózge de qaldyqtardy kórsetedi. Atalǵan jerge Almaty oblysynyń ekologııa departamenti men Eskeldi aýdandyq sanıtarlyq-epıdemıologııalyq baqylaý basqarmasynyń, turǵyn úı sharýashylyǵy, jolaýshy kóligi, avtomobıl joldary jáne turǵynúı ınspektsııa bóliminiń mamandary baryp, vıdeodaǵy derekterdiń rastyǵyn teksergen.
«Kózben sholý kezinde vıdeoda kórsetilgen qaldyqtar (B, V, G sanatyndaǵy medıtsınalyq qaldyqtar, quramynda synap bar buıymdar men jeke qorǵanys zattary) Abaı aýylyndaǵy «Eskeldi aýdanynyń qatty turmystyq zattary» polıgonynyń aýmaǵynan tys jerge tógilgenin anyqtaldy. Osy fakti boıynsha talapty buzǵan adamdy anyqtaý úshin 102 nómirine qońyraý shalynyp, polıtsııa qyzmetkerleri faktini tirkeýge aldy», - dep jazylǵan ekologııa departamenti usynǵan málimette.
Sonymen birge, ruqsat etilmegen jerge tógilgen medıtsınalyq qaldyqtardyń basyna medtsınalyq qaldyqtardy kádege jaratýǵa jaýapty merdiger uıym men Eskeldi aýdandyq ortalyq aýrýhanasynyń ókilderi shaqyrtylǵan.
«Qazirgi tańda Eskeldi aýdanynyń polıtsııa qyzmetkerleri jedel-izdestirý sharasyn júrgizýde. Sonyń qorytyndysy boıynsha QR zańnamasyna sáıkes qajetti sharalar qabyldanady», - delingen vedomstvonyń aqparatynda.