Almaty oblysynda kásipkerlerden 200-den asa shaǵym túsken

TALDYQORǴAN.QazAqparat - Byltyr Almaty oblystyq kásipkerler palatasyna 233 shaǵym túsken. Onyń 80%-y oń sheshimin taýyp, kásipkerlerdiń 900 mln teńge kólemindegi múliktik quqyǵy qorǵalǵan, dep habarlaıdy QazAqparat tilshisi.

«Mysaly «Saryózek munaı ónimderi» kompanııasyna qujattarda qate basylǵan jazý úshin 5 mln teńgege  aıyppul salyna jazdady. Bizdiń zańgerler istiń aq-qarasyn anyqtap, máseleni oń sheship berdi. Nátıjesinde qaýly alynyp tastalyndy. Kásipkerlerdiń zańdy quqyǵy men múddesin qorǵaý Palatanyń negizgi qyzmeti», dedi oblystyq Kásipkerler palatasynyń dırektory Narıman Ábilshaıyqov óńirlik kommýnıkatsııalar ortalyǵynda ótken baspasóz máslıhatynda.

Sondaı-aq, N. Ábilshaıyqov ótken jyly «Bastaý Bıznes» jobasyna 1312 jumyssyz adam qatysyp, onyń 285-i óz isin ashqanyn málimdedi. Al qarjylandyrylǵan joba quny  1 mlrd teńgeden asady.

«Biz memlekettik baǵdarlama aıasynda «Bıznes mektep» komponentin júzege asyramyz. Onyń aıasynda «Bıznes keńesshi», «Bıznes Ósý», «Tálimgerlik qaǵıdalaryn qoldanatyn Jobalyq oqytý» jobalary boıynsha kásipkerlik negizderine oqytamyz. «Bıznes keńesshi» eki kúndik oqytý aıasynda 1 393 adam bilip alyp, kásipker retinde 197 qatysýshy tirkelip, 260 jumys ornyn ashqan. 120-sy jalpy somasy 340,4 mln teńge bolatyn qarjylandyrýǵa qol jetkizgen», - dep atap ótti oblystyq Palata basshysy.

Sonymen qatar, bıyl Almaty oblysynyń birneshe aýdanynda tolyqformatty kásipkerlerge qyzmet kórsetý ortalyǵy ashylady dep josparlanýda.