Almaty oblysynda kásipkerler medıtsına uıymdaryna arnaıy kıimderdi syıǵa tartty
TALDYQORǴAN. QazAqparat - Kásipkerler Almaty oblysyna jalpy quny 100 mln. teńgeden asatyn medıtsına mamandaryna arnalǵan qorǵanysh amýnıtsııasyn qaıtarymsyz berdi, - dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.
Búgin «Universal Energy (Qazaqstan)» kompanııasy men qazaqstandyq kásipkerler Asqar Alshynbaev, Evgenıı Feld, Nurjan Bekshenov, Esenǵalı Báımenov jáne Raıymbek Batalov Covid-19 ınfektsııasymen kúrestiń aldyńǵy sapynda júrgen Almaty oblysynyń medıtsınalyq jáne basqa da uıymdaryna gýmanıtarlyq kómek júkterin jetkizip berdi.
Jalpy quny 100 mıllıon teńgeden asatyn kóp ret paıdalanatyn Dupont kostıýmderi, ınfraqyzyl termometrler, maskalar, respıratorlar, qorǵanys kózildirikteri QHR-dan satyp alynyp, Qazaqstanǵa arnaıy reıspen ákelingen. Bul qorǵanys quraldary indetpen kúres sharalaryna tartylǵan medıtsınalyq jáne basqa da uıymdarǵa bólip berý úshin oblys ákimdigine tapsyryldy. Barlyq medıtsınalyq buıymdar men amýnıtsııa qytaılyq jáne eýropalyq kásiporyndarda óndirilgen, eýropalyq sapa sertıfıkattaryna ıe.
«Ásirese, QR Syrtqy ister mınıstrligine, elimizdiń Qytaıdaǵy Qazaqstannyń elshilikterine indet kezindegi logıstıkalyq qıyndyq jaǵdaıynda bizge quraldardy jetkizýge kómek kórsetkenderi úshin alǵysymyz zor. Bul zamanaýı jeke qorǵaný quraldary bizdiń medıtsına mamandaryna koronavırýspen kúreste úlken kómek bolady dep senemiz», - dep atap ótti qaıyrmdylyq aktsııasynyń bastamashylary.
Bul kómekti ákimdiktiń atynan oblys ákiminiń orynbasary Serik Turdalıev qabyldap aldy.
Bıznestiń áleýmettik jaýapkershiligin berik ustanyp, osyndaı qıyn-qystaý kezeńde óńirge qoldaý bildirgen azamattarǵa oblys ákiminiń orynbasary Serik Turdalıev rızashylyǵyn jetkizdi. Qandaı qıyndyqty da birliktiń arqasynda jeńip shyǵatynymyzǵa senim bildirdi.
«Oblys ákimi Amandyq Ǵabbasuly Batalovtyń atynan «Universal Energy» (Qazaqstan) kompanııasynyń quryltaıshylary I Nan, Bolat Ábilov pen Oraz Jandosovtardyń kórsetken qoldaýlaryna, qamqor nıetterine alǵys aıtamyz», - dedi S.Turdalıev.
Eske salsaq, «Universal Energy (Qazaqstan) kompanııasy jańartylǵan energııalyq nysandardyń qurylysymen jáne ony iske qosýmen aınalysady. Oblys aýmaǵynda atalmysh kompanııanyń «Qapshaǵaı 100 MVt» kún elektr stansasy jumys isteıdi. Oǵan qosa Іle, Sarqan aýdandarynda taǵy eki stansanyń qurylysy júrip jatyr.
