Almaty oblysynda kásipkerdiń úıine qaraqshylyq shabýyl jasaǵandar ustaldy
TALDYQORǴAN.QazAqparat - Almaty oblysyndaǵy Eskeldi aýdanynda 51 jastaǵy kásipkerdiń úıine qaraqshylyq shabýyl jasaldy, dep habarlaıdy QazAqparat tilshisi.
Betterine betperde kıgen bes jigit úıge basa kóktep kirip, kásipkerdi baılap, úıdegi baǵaly áshekeı buıymdar men qomaqty qarjyny qoldy qylǵan. Oqıǵa 30 jeltoqsan kúni Aqtasty aýylynyń mańynda boldy.
Eskeldi aýdanynyń tártip saqshylary oblystaǵy áriptesterimen birge uıymdastyrǵan jedel izdestirý sharasy barysynda bes kúdikti de ustaldy. Onyń bireýi kásipkerdiń sharýashylyǵynda buǵan deıin jumys istegen.
Qazir bes adam qamaýǵa alyndy. Al olardan tárkilengen qarý arnaıy saraptamaǵa jiberildi. Osy oqıǵaǵa baılanysty QR QK 192-babyna sáıkes (Qaraqshylyq) is qozǵalyp, tergeý jalǵasýda. Qazir qylmystyq oqıǵa oblystyq ishki ister departamentiniń basty qadaǵalaýynda.
Al atalǵan mekemeniń baspasóz qyzmetiniń málimetinshe, ustalǵan kúdiktilerdiń jasy 22-30 aralyǵynda.
