Almaty oblysynda kásipker joǵalyp ketti
ASTANA. QazAqparat - Almaty oblysynda jeltoqsan aıynyń basynda qupııa jaǵdaıda joǵalyp ketken kásipkerdi izdestirýde. Qapshaǵaıdaǵy úıinde turaqqa qoıylǵan Valerıı Harlanovtyń avtokóliginde qannyń izderi tabylǵan. Týystary er kisini urlaýy múmkin deıdi. Osy ýaqyt aralyǵynda birde-bir týysymen habarlaspaǵan. Eshkim qarjy talap etpedi, dep habarlaıdy KTK.
39 jastaǵy Valerıı Harlanovty týystary táýlik boıy úzdiksiz izdestirýde. Sońǵy ret ony Qapshaǵaı qalasynyń syrtyndaǵy shaǵyn dúkende keshqurym kórgen. Valerııdiń úıinde eski kóligi ashyq qalǵan. Dostary mashınany jaqynda ǵana Almatyǵa aıdap alyp keldi. Jaqyndarynyń aıtýynsha, kóliktiń salonynda qannyń jáne bireýdiń saýsaq izderi tabylǵan. Biraq onyń kimge tıesili ekendigi ázirge belgisiz. Avtokólikten mashına bazaryndaǵy konteınerdiń kilti men qujattar joǵalǵan.
- Men onyń úıine kirgende, tóbelestiń nemese shashylǵan zattardyń belgilerin kórmedim. Bir adamnyń jalǵyz ómir súrgeni ǵana kórindi. Barlyǵy óz qalpynda turdy - qasyqtar, staqandar men ıttiń tamaǵy, - dep aıtady Aleksandr Bocharov.
Valerıı Harlanov sońǵy jyldary Almatynyń mańynda turǵan. Avtobólshekter satýmen aınalysqan. Jubaıymen birneshe jyl buryn ajyrasqan, alaıda qyzymen qarym-qatynasyn úzbegen. Birinshi bolyp polıtsııaǵa qyzy habarlasqan. Krıstınanyń aıtýynsha, ákesiniń iz-túzsiz joǵalýyna birge turatyn áıeldiń qatysy bar.
