Almaty oblysynda kásipker ákimdiktiń kesirinen jer teliminen aıryla jazdady
Belgili bolǵandaı, sharýa qojalyǵy basshysynyń óliminen keıin aýdandyq jer qatynastary bólimi ýchaskeni ıesiz jer dep tanyp, úshinshi tulǵaǵa ýaqytsha jalǵa berý týraly qaýly shyǵarǵan.
Atalmysh másele oblystyq Kásipkerler palatasynyń kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń kezekti otyrysynda qaralyp, onda kásipkerdiń jesiri Nadejda Syrovıatskaıa jergilikti atqarýshy organnyń áreketine shaǵymdanǵan. Azamattyq kodeks boıynsha mura muragerlik ashylǵan ýaqyttan bastap alty aı merzim ishinde tapsyrylýy tıis eken.
«Másele qaralǵan soń, Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesi Sarqan aýdanynyń jer qatynastary bólimi shyǵarǵan sheshimniń qanshalyqty zańdy ekenin anyqtaý úshin materıaldardy Memlekettik qyzmet isteri jáne sybaılas jemqorlyqqa qarsy is-qımyl departamentine joldady», - deıdi Kásipkerler palatasynyń sarapshysy Dýman Kerimbaev.
Departament jer ýchaskesi boıynsha materıaldy qarastyrý barysynda Sarqan qalasy ákimi apparatynyń bas mamany sharýa qojalyǵy basshysynyń qaıtys bolǵany týraly anyq emes málimet bergenin anyqtady. Bul óz kezeginde negizsiz sheshim shyǵarýǵa sebep bolǵan.
«Jiberilgen qatelikter úshin Sarqan aýdany ákimi apparatynyń bas mamany «sógis» túrindegi tártiptik jazaǵa tartyldy. Jer ýchaskesin JShS-ǵa ýaqytsha paıdalanýǵa berý týraly qaýly alynyp tastaldy. Jer ýchaskesi zańdy muragerlerge qaıtaryldy», - delingen Almaty oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Serikbaı Nurǵısaevtyń resmı jaýabynda.
