Almaty oblysynda kásipker 6 mln teńgege jýyq shyǵynǵa ushyrady
TALDYQORǴAN.QazAqparat - Almaty oblysynda «Alfa AJ» seriktestigi 6 mln teńgege jýyq shyǵynǵa usharydy. Atalǵan seriktestiktiń basshysy Aqsý aýdanynda jer qoınaýynan qıyrshyq tastardy óndirýge ruqsat alǵan, dep habarlaıdy QazAqparat tilshisi.
Biraq Aqsý aýdanynyń ákimdigi alǵashqyda jer qoınaýyn qoldanýǵa ruqsat berip, artynsha kelisim shartty buzǵan. Sebep, atalǵan jer aýylsharýashylyq maqsatyndaǵy telim bolyp shyǵypty.
QR Jer kodeksiniń 90-babyna sáıkes aýylsharýashylyq maqsattaǵy jerlerdi ózge maqsatta paıdalanýǵa ruqsat joq. Endi eki ortada qalǵan «Alfa AJ» seriktestiginiń basshysy Asqar Jamanqulov shyǵynǵa ushyrap, ádildik izdep júr. Al kásipkerdiń quqyǵyn qorǵaýmen Almaty oblystyq Kásipkerler palatasy aınalysyp jatyr.
«Bul jerde jergilikti atqarýshy organdardyń jibergen zań buzýshylyqtary anyqtalǵandyqtan, tıisti organdarǵa tıisti qujattaryn joldadyq. Ádil sheshim bolady degen úmittemiz», - dedi Almaty oblystyq kásipkerlik palatasyndaǵy kásipkerlerdiń quqyǵyn qorǵaý bóliminiń basshysy Ádilet Sultanbek.