Almaty oblysynda qashyqtan oqyǵan 300 oqýshydan koronavırýs anyqtaldy
TALDYQORǴAN. QazAqparat – Almaty oblysynda oqý jylynyń basynan beri mektep oqýshylary arasynda COVID-19-dyń zerthanalyq rastalǵan 320 jaǵdaı tirkelgen, onyń ishinde 20 bala kezekshi synyptarda, 300 – qashyqtan oqyǵan. Bul týraly QazAqparat VAK jumysy týraly telegram kanalǵa silteme jasap habarlaıdy.
Almaty oblysy Sanıtarııalyq-epıdemıologııalyq baqylaý departamentiniń baqylaýynda 400 myńnan astam bala bilim alatyn 765 jalpy bilim beretin mektep bar. Sanıtarııalyq erejelerdiń talaptaryn saqtaý úshin oblys mektepteri antıseptıktermen, bakterıtsıdti jáne kvartsty shamdarmen, eden tósenishterimen qamtamasyz etilgen, jýý jáne dezınfektsııalaý quraldarynyń azaımaıtyn qory qamtylǵan.
Medıtsına qyzmetkerleri tarapynan barlyq bilim berý mekemeleriniń qyzmetkerleri men bilim alýshylardyń kúndelikti tańerteńgilik súzgisin (termometrııa, ǵımaratqa kire beriste qoldy antıseptıkpen óńdeý, aıaq kıimniń tabanyn óńdeý) júrgizedi.
Oqý jylynyń basynan beri oblys mektepterine 296 tekserý júrgizilgen, onyń ishinde erekshe tártip boıynsha 50 mektep tekserilgen. Buzýshylyqtar 22 bilim berý mekemesinde anyqtalyp, 1 833 470 teńge aıyppul salynǵan. Buzýshylyqtardy joıý týraly 22 uıǵarym berildi.
Taldyqorǵan qalasyndaǵy mektepter men gımnazııalarda qashyqtan oqytý 2020 jyldyń 21 qańtaryna deıin uzartylǵan.
