Almaty oblysynda qarýly top ustaldy
TALDYQORǴAN. QazAqparat - Almaty oblysynyń polıtseıleri qarýly topty ustady, dep habarlaıdy QazAqparat tilshisi.
Eńbekshiqazaq aýdanynyń Shelek aýyly mańyndaǵy Qorǵas-Almaty jolynda polıtseıler Volkswagen Golf avtokóligin toqtatty. Kóliktiń salonynda 22-25 jas aralyǵyndaǵy úsh er adam bolǵan.
«Úsheýi Eńbekshiqazaq aýdanyndaǵy jeke menshik úıler men páterlerge birneshe ret urlyqqa tústi dep kúdiktelýde. Osy top boıynsha jedel is-shara eki aı boıy ázirlenip, júrgizildi. Kúdiktiler toby ustalǵan kezde, 16 kalıbrli ańshy myltyǵy, sondaı-aq pnevmatıkalyq tapansha tabyldy. Sonymen qatar, olardyń kóliginiń salonyndaǵy qupııa orynda 2 keli marıhýana tabyldy. Ustalǵandar Eńbekshiqazaq aýdandyq polıtsııasyna jetkizildi», - dep málim etti Almaty oblysy ІІD baspasóz qyzmeti.
Polıtsııanyń aıtýynsha, top músheleri Eńbekshiqazaq jáne Raıymbek aýdandarynyń turǵyndary. Kúdiktilerdiń biri buryn urlyq jasaǵany úshin qylmystyq jaýapkershilikke tartylǵan.
Tárkilengen alynǵan qarý saraptamaǵa jiberildi.
«Qolda bar aqparatqa sáıkes, urylar óńirde ótken jyldyń jazynan beri zergerlik buıymdar men aqsha urlaǵan. Kúdik boıynsha 8 urlyqqa qatysy bar. Tergeý qylmystyq zańnamanyń birneshe baby boıynsha (urlyq, esirtki men qarýdy zańsyz saqtaý) júrgiziledi. Kúdiktiler qamaýǵa alyndy. Atalǵan is oblystyq departamenttiń erekshe baqylaýyna alyndy», - dep atap ótti baspasóz qyzmetindegiler.
