Almaty oblysynda qarýdy erikti tapsyrǵandarǵa 345 myń teńgege deıin tólenedi
10 sáýirde zańsyz saqtalyp kelgen atys qarýyn, oq-dárini jáne jarylǵysh zattardy polıtsııaǵa erikti túrde tapsyrý aktsııasy bastaldy. Qarýdy óz erkimen tapsyrǵandar jaýapkershilikke tartylmaıdy, kerisinshe, aqshalaı syıaqy alady. Almaty oblysynyń turǵyndary ol úshin turǵylyqty jeri boıynsha kez kelgen aýmaqtyq polıtsııa organyna júgine alady.
«Erikti túrde tapsyrylǵan qarý úshin tólem somasy onyń túrine, tehnıkalyq jaǵdaıyna baılanysty jáne ár birlik úshin 6-100 aılyq eseptik kórsetkish (1 AEK – 3450 teńge) aralyǵynda jasalady. Mysalǵa, ıir oıyqty avtomat qarýyn tapsyrǵan azamat árbir birligi úshin 100 AEK-ke deıin ala alady. Osyndaı somanyń teń jartysy sholaq myltyqtar men karabınder úshin tólenýi múmkin», - delingen Almaty oblystyq Polıtsııa departamentiniń baspasóz qyzmeti habarlamasynda.
Tólemder mólsherin arnaıy komıssııa belgileıdi.