Almaty oblysynda qart shopanǵa qurmet kórsetildi
TALDYQORǴAN. QazAqparat - Almaty oblysynda qart shopanǵa qurmet kórsetildi. Seksenniń seńgire jetken Tólegen Qulahmetovti Almaty oblysy ákiminiń orynbasary Jaqsylyq Omar Úshtóbe qalasyndaǵy úıine arnaıy izdep baryp, mereıtoıymen quttyqtap qaıtty. Qazynaly qartqa syı-qurmet kórsetip, eseli eńbegi óskeleń urpaqqa úlgi-ónege ekenin jetkizdi, dep habarlaıdy QazAqparat tilshisi.
Tólegen Qulahmetov 35 jyldan astam ýaqyt mal sharýashylyǵynda jumys istep, aldyńǵy qatarly ozat shopan bolǵan. 100 qoıdan 155 bas qozy alyp, aýyl sharýashylyǵy salasynyń damýyna súbeli úles qosty. 1981 jyly eńbegi elenip, «Sotsıalıstik Eńbek Eri» ataǵyn aldy. Aqsaqal qudaı qosqan jary Gúlshetaı ájeımen 3 qyz bir ul tárbıelep ósirip, búginde solardan 10 nemere jáne 11 shóbere súıip otyr. Áýlıeler mekeni sanalatyn Qaratal aýdanynan 30-dan astam Eńbek Eri shyqqan. Solardyń biri eńbekke erte aralasqan Qulahmetov Tólegen aqsaqal.
