Almaty oblysynda káriz júıesiniń qudyǵyna qulaǵan sıyr qutqaryldy
TALDYQORǴAN.QazAqparat – Almaty oblystyq Tótenshe jaǵdaılar departamentiniń qutqarýshylary káriz júıesiniń qudyǵyna qulap ketken sıyrdy shyǵardy. Janýardy qutqarýǵa eki tehnıka men 7 qutqarýshy jumyldyrylǵan, dep habarlaıdy QazAqparat tilshisi.
Oqıǵa Taldyqorǵan mańyndaǵy Moınaq aýylynda bolǵan.
«Janýar jekemenshik úı aýlasynda jaıylyp júrip káriz júıesi qudyǵynyń ashyq lıýgine (qaqpaqsyz) qulap ketken. Mamandar sıyrdy Taldyqorǵan qalasynyń № 1 MÓSB ASA-20 avtokóliginiń kóterý mehanızminiń kómegimen shyǵaryp aldy. Qutqarý operatsııasy shamamen 30 mınýtqa sozyldy. Oqıǵa nátıjesinde janýar zardap shekken joq», - dedi oblystyq TJD baspasóz qyzmetiniń ókili Azamat Jurtbaev.
Esterińizge sala keteıik, byltyr tamyz aıynda Almaty oblysynda egde áıel adam lıýkke qulap, eki saǵat kómeksiz jatqanyn habarlaǵan bolatynbyz. Bul oqıǵa Eskeldi aýdanynyń Baqtybaı aýylynda boldy. Sol sebepti TJD-ń ókilderi adamdarǵa barynsha abaı bolýdy eskertedi.
