Almaty oblysynda káriz qaqpaqtaryn urlady degen kúdikpen áke men bala ustaldy
TALDYQORǴAN. QazAqparat - Almaty oblysynyń polıtseıleri káriz jáne aryq qaqpaqtaryn urlady degen kúdikpen ákeli-balaly eki azamatty ustady. Oqıǵa Uıǵyr aýdanynyń ortalyǵy Shonjy aýylynda bolǵan, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, qarasha aıynyń basynda polıtsııaǵa shoıynnan quıylǵan káriz qaqpaqtarynyń jappaı joǵalyp jatqany týraly aryz túse bastaǵan. Tártip saqshylary, óz kezeginde, metall synyqtaryn qabyldaý oryndaryn tekserip, kúdikti tulǵalardy anyqtaý maqsatynda jumys isteıtin jedel tergeý tobyn qurǵan.
«Júrgizilgen is-sharalar barysynda qaqpaqtardy urlaýmen jáne ony túrli tústi metall qabyldaıtyn oryndarǵa ótkizýmen aınalysqan bir otbasynyń eki azamaty anyqtaldy. Kúdiktilerden bir aı ishinde 3 tonnaǵa jýyq káriz jáne aryq qaqpaqtaryn tasymaldaýy múmkin avtokólik tárkilendi. Qazirgi ýaqytta ustalǵandar 120 qaqpaqty urlady dep kúdikke ilindi. Kúdiktilerdiń úıinen tabylǵan jáne tárkilengen 42 shoıyn qaqpaq qylmystyq óndiris materıalyna aıǵaqzat retinde tirkeldi»,- delingen atalǵan vedomstvo taratqan habarlamada.
Qazirgi tańda QR Qylmystyq kodeksiniń 188-babyna sáıkes urlyq faktisi boıynsha sotqa deıingi tergeý amaldary júrgizilýde.
Sonymen qatar, polıtseıler kúdiktilerdiń urlanǵan qaqpaqtardy bólshektep ótkizgen metal qabyldaý ornyn anyqtady. Onyń ıesi de urlanǵan múlikti satyp alǵany úshin jaýapkershilikke tartylady.
