Almaty oblysynda karantınge jabylǵan turǵyn úı keshenine tegin azyq-túlik jetkize bastady
ALMATY OBLYSY. QazAqparat – Almaty oblysynyń Qarasaı aýdanynda karantındegi «Asyl arman» turǵyn úı kesheniniń turǵyndary ákimdikten tegin azyq-túlik taýarlaryn ala bastady, - dep habarlaıdy Almaty oblysy ákiminiń baspasóz qyzmeti.
«Almaty oblysynyń ákimi Amandyq Batalovtyń tapsyrmasyna sáıkes keshe karantındegi turǵyn úı kesheninde turǵyndarmen jıyn ótkizdik. Kezdesý barysynda birinshi kezekte biz azyq-túlikke óte muqtaj adamdardy anyqtadyq. Óıtkeni karantınnen bólek turǵyndardyń kópshiligi jumyssyz qaldy. Oǵan qosa aldaǵy ýaqytta sheshimi qarastyrylatyn birqatar turmystyq máseleler talqylandy, - dedi oblys ákiminiń orynbasary Serik Turdalıev.
«Biz olarǵa budan bylaı da qoldaý kórsetemiz. Muqtaj adamdardyń tizimi basqarýshy kompanııalardan kelip túsýde. Azyq-túlikten basqa turǵyn úı keshenine 10 myńdaı bir rettik maskalar aparyp berildi. Olar tegin taratylýda».
Alǵashqy azyq-túlik paketteri búgin 1215 adamdy qamtıtyn 240 páterge berildi.
Ákimdik ókilderiniń aıtýynsha, birinshi kezekte kópbalaly, az qamtylǵan otbasylar, múgedekter, qart adamdar jáne jumyssyz qalǵandar sııaqty halyqtyń áleýmettik áljýaz toptary nazarǵa alyndy. Turǵyn úı keshenine azyq-túlik taratý isine keshende turatyn turǵyndar arasynan shyqqan volonterlar da belsendi áreket etýde.
«Jaǵdaıdy ózderińiz kórip otyrsyzdar. Biz jumyssyz qaldyq, ómir súrýge kerekti qajettilikterge zárýmiz. Aldynda ýaymdaǵanymyz ras, biraq ákimdik bizdi qıyndyqta jalǵyz qaldyrǵan joq. Qoldap, kómek kórsetip jatyr», - dedi «Asyl arman» TK turǵyny Aleksandr Tsoı.
Atap ótsek, turǵyndardyń kópshiligi úılerin ıpotekamen alǵandyqtan, jergilikti bılik ıpoteka tóleminiń máselesin qarastyrýda.
«Bul másele ár jaǵdaıdy jeke-jeke alyp qarastyrylatyn bolady», - dedi oblys ákiminiń orynbasary Serik Turdalıev.
Sol sııaqty TK turǵyndary karantın aıaqtalǵannan keıin «Jumyspen qamtý jol kartasy» boıynsha jumysqa tura alatyndyǵy da aıtyldy.
«Qoldaýdyń qosymsha sharalarynyń arqasynda jumystan shyǵyp qalǵan jáne jumyssyz azamattar úshin 68 myń jumys orny ashylatyn bolady. Máselen, «Eńbek» baǵdarlamasy sheńberinde jumyspen qamtý sharalarymen 22 myń adamdy qamtý josparlanǵan. Jumys oryndaryn qurýda Memleket basshysynyń Jumyspen qamtý jol kartasyna 1 trln. teńge bólý týraly sheshimi zor yqpal etedi. Sol qatarda bizdiń oblysqa 109,2 mlrd. teńge bólindi. Bul qarjyǵa 22,8 myń jumys ornyn quratyn 977 joba júzege asyrylmaq», - delingen baspasóz qyzmetiniń habarlamasynda.
