Almaty oblysynda karantın rejımin buzǵan 2 adam qamaýǵa alyndy
TALDYQORǴAN. QazAqparat - Almaty oblysynda karantın rejımin buzǵan 211 azamatqa hattama toltyryldy. 194 is sotqa jóneltildi, dep habarlaıdy QazAqparat tilshisi.
Almaty oblysynyń bas memlekettik sanıtarlyq dárigeri Qaırat Bamuhambetovtiń málimetinshe, óńirde karantın jarııalansa da rejımdi buzyp, tártipke baǵynbaı jatqandar áli de kóp. Atap aıtqanda, turǵyndar sanıtarlyq beketterden ótip ketýge árekettený, belgili bir sebepsiz kóshede júrý, kólikte úsh adamnan artyq otyrý sııaqty karantın talaptaryn oryndamaýda.
«Bizdiń qyzmetkerlerge keletin bolsaq: búgingi kúni 200-den asa hattama toltyrylyp, 194 sot arqyly ótip, 4 mln 800 myńǵa aıyppul salyndy. Onyń ishinde eki adam qamaýǵa alynyp, 13 eskertý jasaldy», - dedi bas sanıtarlyq dáriger.
Qazirgi saǵatqa tirkelgen 41 jaǵdaıdyń 7 naýqas syrttan kelgen. Qalǵan 34 juqtyrǵan azamat jergilikti turǵyndar. Qaırat Baımuhambetovtyń aıtýynsha koronavırýs oblys aýmaǵynda bar. Al onyń taralýyn toqtatý úshin turǵyndar úıde otyrý kerek.
«Vırýs bizdiń aýada, qorshaǵan ortada bar. Qalǵan jeteýi syrttan kelse, qalǵany jergilikti jaǵdaı. Sondyqtan halyqqa aıtatynym úıde otyrý kerek. Ortada júrgende maska kııý kerek. Qoǵamdyq kólikti toqtattyq. Aýyl arasynda da eshqandaı kólik júrmeıdi. Jumysta 70 paıyz qashyqtan jumys isteý kerek. Eger osyny saqtap, vırýstyń taralý shynjyryn úzsek, karantınnen de ýaqytynda shyǵamyz», dep atap ótti Qaırat Baımuhambetov.
