Almaty oblysynda karantın erejesin buzbaq bolǵan bir top adam qolǵa tústi
TALDYQORǴAN. QazAqparat - Almaty oblysy Polıtsııa departamenti Ózindik qaýipsizdik basqarmasynyń jedel ýákilderi bir top tulǵanyń karantın aımaǵynyń shekarasyn zańsyz kesip ótýge oqtalǵanyn áshkereledi, - dep habarlaıdy QazAqparat tilshisi.
«Qarasaı aýdanyndaǵy Kókózek aýyly mańynda karantın kezinde jolaýshylardy zańsyz tasymaldaý deregin tekserý barysynda tártip saqshylarynyń nazaryna 5 adamnan quralǵan toptyń áreketi kúdik týdyrǵan. Olar Almaty qalasynyń aýmaǵynan Almaty oblysyna blokposttardy aınalyp, jasyryn ótýge tyrysqan. Sonymen qatar, polıtseıler zańsyz ótýshilerdi aldyn ala kelisim boıynsha belgilengen jerde kútip turǵan taksı júrgizýshisin de ustaǵan», - dedi Almaty oblysy PD Ózindik qaýipsizdik basqarmasynyń bastyǵy polıtsııa polkovnıgi Áset Karmenov.
Ustalǵan bes azamat pen kámeletke tolmaǵan jasóspirimniń anasyna tótenshe jaǵdaı tártibin buzý deregi boıynsha QR ÁQbK 476-babyna sáıkes ákimshilik hattama toltyryldy. Toltyrylǵan hattama sotqa jiberilip, quqyq buzýshylar ákimshilik jaýapqa tartylatyn bolady.
Aıta keteıik, oblystyq polıtsııanyń Ózindik qaýipsizdik basqarmasynyń qyzmetkerleri Almaty oblysy aýmaǵyndaǵy shekteý jáne blokposttarda turǵyndardyń zańsyz áreketterin boldyrmaý jáne onyń aldyn alý sharalaryn belsendi júrgizýde.
