Almaty oblysynda qaraquıryq atqandar 1 mln teńgeden aıyppul tóleýi múmkin
TALDYQORǴAN. QazAqparat - Almaty oblysynyń aýmaǵynda «Qyzyl kitapqa» engen qaraquıryqty atty degen kúdikpen Uıǵyr jáne Panfılov aýdandarynyń eki turǵyny ustaldy. Brakonerlerdiń ár qaısysyna 400 AEK ıaǵnı, 1 mln teńgege jýyq aıyppul salynýy múmkin, - dep habarlaıdy QazAqparat tilshisi.
Tabıǵatty qorǵaý vedomstvolarymen birlesken reıd barysynda 31 qazanda polıtseıler Uıǵyr aýdany aýmaǵynda atýǵa qatań tyıym salynǵan qaraquıryqty oljalaǵan brakonerdi qolǵa túsirgen. Zańsyz ańshylyq jasaǵan azamattan ań eti, «Tıgr» oıyq myltyǵy, ańshy myltyǵy jáne oq-dáriler tárkilengen.
«Almaty oblysynyń aýmaǵynda «Qyzyl kitapqa» engen qaraquıryqty atqany úshin Uıǵyr aýdanynyń 53 jastaǵy turǵynyna qatysty Qylmystyq kodekstiń 337-baby, 4-tarmaǵyna sáıkes sotqa deıingi tergeý amaldary júrgizilip jatyr»,- dep málimdedi Almaty oblystyq Polıtsııa departamentiniń baspasóz qyzmeti.
Vedomstvo taratqan aqparatqa sáıkes, zańsyz ańshylyqpen kúresti kúsheıtýge arnalǵan ekinshi fakti Panfılov aýdanynyń mańynda tirkelgen. Ol jerde 54 jastaǵy azamat basqarǵan «Ýaz» avtokóligin tekserý barysynda qaraquıryq eti men «Moskına» oıyq myltyǵy, sondaı-aq ózge ańshy myltyǵy jáne oq-dáriler tabyldy. Atalǵan azamatqa qatysty sotqa deıingi tergeý amaldary júrgizilýde.
Almaty oblystyq Polıtsııa departamentiniń baspasóz qyzmeti qaraquıryqty atqany úshin zańǵa sáıkes brakonerlerden memleket paıdasyna 400 AEK mólsherinde materıaldyq shyǵyn óndirilýi tıis ekenin eske salady.
Osyǵan deıin Almaty oblysynda Qyzyl kitapqa engen qaraquıryqtardy atqan brakonerlerdiń qolǵa túskendigi týraly jazǵanbyz.
