Almaty oblysynda qaraqshylyqty qoldan jasaǵan qylmystyq top ustaldy
TALDYQORǴAN. QazAqparat - Almaty oblysyndaǵy Іle aýdanynyń tártip saqshylary qaraqshylyqty qoldan jasaǵan qylmystyq topty ustady , dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa 15 sáýir kúni aýdan ortalyǵy Ótegen batyr kentinde tirkelgen. 34 jáne 31 jastaǵy eki azamatqa jolda shabýyl jasalyp, beıtanys eki azamat olardyń iri kólemdegi aqshasyn alyp ketken. Tergeý barysynda olardyń bir fırmada birge qyzmet atqaratyny jáne qarjy da sol fırmaǵa tıesili ekeni anyqtalǵan.
«Zardap shekkenderdiń ózderi oqıǵaǵa qatysty kýálik sózderinen jańylysyp, osy qylmysqa qatysy bar ekenin bildirip qoıdy. Jedel izdestirý sharalary barysynda qaraqshylyq jasaǵan taǵy eki sybaılasy ustaldy. Tórt kúdikti bir-birine ózara jaqyn tanys bolyp shyqty. Fırmanyń 18 mıllıonnan astam qarjysyn ıemdengisi kelgender qaraqshylyqty ózara josparlaǵan. Kúdiktilerden qarjynyń bir bóligi men aqsha salynǵan sómke tárkilendi»,- dep atap ótti vedomstvo ókilderi.
Polıtsııa taratqan aqparatqa sáıkes, derekke qatysty qozǵalǵan qylmystyq is Іle aýdany polıtsııasynyń óndirisinde. Aýdandyq sottyń sanktsııasyna sáıkes eki kúdikti qamaqqa alynyp, solardyń josparlaýymen qylmysqa barǵan eki sybaılasy mekenjaıyn ózgertpeý týraly mindettememen bosatyldy.
